Terrorçu kürd təşkilatı PEJAK-ın Ermənistan ərazisində təlim keçdiyi barədə açıqlama təkzib olundu. İran XİN mətbuat xidməti erməniləri məmnun etdi. "NEWS.am"ın məlumatına əsasən, bu qurumdan bildirilib ki, terrorçu kürd təşkilatı PEJAK-ın Ermənistan ərazisində təlim keçməsi gerçəkliyi əks etdirmir. Nazirliyin mətbuat xidməti bu təkzibi Tehranda akkreditə olunan xarici ölkələrin səfirləri ilə görüşdə bəyan edib.
Qurumun rəhbərliyi bildirib ki, kürd yaraqlılarının Ermənistan ərazisində təlim keçməsi "dezinformasiyadır və rəsmi olmayan mənbələrin məlumatlarına inanmaq düz deyil".
Xatırladaq ki, bir müddət öncə İranın ali rəhbəri ayətulla Xamneyinin Ərdəbildəki təmsilçisi höccətülislam Seyid Həsən Amili terrorçu PEJAK və PKK qruplaşmalarının təlim keçdiyi yer haqda bunları bildirmişdi:
"Bu qruplaşmaların ünsürləri Azərbaycan Respublikasının Dağlıq Qarabağ ərazisində təlim keçir. Dağlıq Qarabağ hazırda ABŞ və sionist rejimin əlindədir. ABŞ və sionist rejim bu ünsürləri Dağlıq Qarabağda yetişdirir, sonra isə İrana qarşı terror əməliyyatı törətməyə göndərir...".
Maraqlıdır, ali rəhbərin nümayəndəsi nə vaxtdan "rəsmi olmayan mənbə" sayılır?
|
