Əməkdar artist Aybəniz Haşımova və qızı Aynişan Quliyeva, bəstəkar Tahir Əkbər qonşu Gürcüstanda bir həftə Saqareco rayonunun Qaraçöp kəndində qonaq olublar. Bakıya qayıdan Aybəniz Haşımova səfər təəssüratını media ilə bölüşüb:

"Bizi Gürcüstana gənc ifaçı Xəlil Qaraçöp dəvət etmişdi. Gəlişimizə soydaşlarımız çox sevinirdilər. Getdiyimiz hər yerdə qurbanlar kəsilirdi. Hara gedirdiksə, Azərbaycan bayrağı əlimizdə olurdu. Küçələrdə bizi Azərbaycan bayrağı ilə qarşılayırdılar. Orada yaşayan azərbaycanlılarla görüşəndə birinci bayrağımızı öpürdülər".

Aybəniz xanım qızı Aynişanla birlikdə qaraçöplülər qarşısında konsert proqramı ilə çıxış ediblər. Konsertə ətraf kəndlərdən gələnlər olub. Aybəniz xanım onların konsertdən böyük zövq aldıqlarını söyləyir:

"Minlərlə tamaşaçı var idi. Konsert çox möhtəşəm keçdi. Bizi səhnədən buraxmaq istəmirdilər. Konsertin sonuna yaxın bir leysan töküldü. İnanın, səhnəni tərk etməyincə bir nəfər də olsun yerindən tərpənmədi".

Onlar Gürcüstanın bir çox yerlərində olublar: Aybəniz Haşımova soydaşlarımızın ölkəmizə sevgisindən ağızdolusu danışır: "Bu insanlarda nə qədər milli təəssübkeşlik var. Mən onlara valeh oldum".