Kənd təsərrüfatı nazirinin müavini Bəhram Əliyevin rəsmi mətbuatda dərc olunan məqaləsində deyilir ki, nazirlik ətin qiymətinin artmasından çox narahatdır. Əliyevin sözlərinə görə, 2010-cu ildə Azərbaycanda 253,8 min ton diri çəkidə ət istehsal edilib. Bu isə ötən il ilə müqayisədə 7,6 faiz çoxdur. Buna baxmayaraq, ətin qiymətinin artırılması ciddi narahatlığa səbəb olur.
Əliyev "Ölkədə quşçuluq təsərrüfatını da inkişaf etdirmək lazımdır", - deyib. "Quş ətinin istehsal həcminin 80 min tona çatdırılmasında aktual vəzifələrdən biri quş yemlərinin və onun komponentlərinin idxal və istehsal mexanizminin işlənməsidir ki, bu da ərzaq təhlükəsizliyi üzrə dövlət proqramında öz əksini tapıb", - Əliyev əlavə edib.
Dövlət Statistika Komitəsinin məlumatına görə, ötən ilin müvafiq dövrü ilə müqayisədə 2011-ci ilin ilk yeddi ayı ərzində Azərbaycanda kənd təsərrüfatı məhsullarının istehsalı 10,2 faiz, o cümlədən heyvandarlıq məhsulları 4,8 faiz bahalaşıb. Ət istehsalı ötən ilin anoloji dövrü ilə müqayisədə 5,5 faiz, süd 8,4 faiz, yun 6,8 faiz artıb, toyuq yumurtası 16,8 faiz azalıb.
Heyvandarlıq sahəsində ilk yeddi ay ərzində 243,3 min ton ət, 941,3 min ton süd, 590,6 milyon ədəd toyuq yumurtası, 14,6 min ton yun istehsal edilib.
Amma bahalaşma gedir. Nazir müavini ərzaq təhlükəsizliyi üzrə dövlət proqramında 2015-ci ilədək ətin istehsal həcminin 340 min tona, südün isə 2,4 milyon tonadək artırılması üzrə tədbirlər görüləcəyini də bildirib. Əliyevin sözlərinə görə, Bakıda ət satışı üzrə obyektlərin tikilməsi və iri fermer təsərrüfatlarının istifadəsinə verilməsi yaxşı olardı.
|
