Ötən ay ilk övladını dünyaya gətirən və uzun aylardır rəqs fəaliyyətinə ara verən rəqqasə Məryəm Süleymanova səhnə üçün çox darıxır. Qəzetimizə bu duyğularını etiraf edib və bildirib ki, rəqs etmədiyi hansısa məqamlar ona psixoloji təsir edir:
"Hələ ana olmağa hazırlaşdığım dönəmdə həkimdən vacib olanları öyrənmişəm. Uşaq dünyaya əməliyyat üsulu ilə gəldiyi üçün bir müddət gözləməli idim. Artıq hərəkətimdəki problemlər aradan qalxıb. Amma bu, səhnədə rahat hərəkətimə imkan vermir. İndi rəqslə məşğul olmağa başlasam, həyatımı böyük riskə atmış olaram. Səhhətim mənim üçün önəmlidir. Amma səhnədən artıq uzaq düşməyəcəm. Həkimin tövsiyəsinə görə, sentyabrın son həftəsindən başlayaraq yavaş-yavaş rəqs hərəkətlərinə başlayacam. Bir neçə gündən sonra isə sərbəst səhnəyə çıxa bilərəm. Övladım və sənətim mənim üçün çox vacibdir. Ona görə də, analıq borcumu yerinə yetirməklə yanaşı, sənətimlə də məşğul olacağam".
|
