Yayın bu isti günlərində yaxın çevrəsi ilə birlikdə istirahət edən Aygün Kazımova özünə 10 günlük proqram ayırıb. Onların Azərbaycanın səfalı bölgələrindən birində dincəldiyini öyrəndik.

Onu da öyrəndik ki, Aygün Kazımova tezliklə daha bir yeniliyə imza atacaq. Yenilik deyəndə - klub sahibi olacaq. Hazırda obyektdə hazırlıq işləri getdiyi söyləndi. Xalq artisti istirahətə burada bəzi işləri tamamlayandan sonra yollanıb.

Klubun açılışı gələn ayın ilk həftələrində gözlənilir. Məkanın adı isə artıq bəllidir. "Ay və gün" adlı dərgi buraxan sənətçi kluba da eyni adı verdiyini bildirib. Əyləncəli gecə məkanının fərqli tərəfləri olacaq. Orada şou-proqramlarla yanaşı sənətçinin öz fanatları ilə görüşləri də nəzərdə tutulub. Şou-proqramları ssenariləşdirilmiş şəkildə təşkil etmək planlaşdırılıb.