Namiq Qaraçuxurlu uzun müddət xalq artisti Aygün Kazımova ilə sevgi münasibəti yaşasa da, onların məhəbbəti bitdi. Deyilənə görə, Namiqin Aygündən sonra qız dostlarının sayı hər gün çoxalır. Hətta şayiələrə görə, Qubada sevgilisi ilə istirahət edib. Başqa bir xəbərə görə, Namiq yeni sevgilisi ilə rahat dincəlmək üçün ani qərar verərək xarici ölkələrdən birinə üz tutub. Məlumatı dəqiqləşdirmək üçün meyxanaçı ilə əlaqə yaratmağa çalışdıq. Onun telefonu bağlı olduğundan bu fikrə Namiqin dostu və prodüseri Ataş aydınlıq gətirdi. Ataş Namiqin bir neçə gün öncə Qubada istirahət etdiyini təsdiqləsə də, meyxanaçının istirahət zamanı tək olub-olmadığı barədə söz demədi. Onu öyrəndik ki, Namiq Azərbaycanda deyil, xarici ölkələrdən birində istirahət edir. Onun evlənəcəyi haqda açıqlaması artıq gerçəyə doğrudur. 33 yaşında olan meyxanaçı bu günə qədər evlənməklə bağlı qəti danışmayıb. Prodüseri deyir ki, bu günlərdə onun Namiqlə eyni mövzuda ciddi söhbəti olub. "Sözün düzü, artıq Namiqin evlənmək vaxtı keçir. Qısa müddət öncə bu barədə onunla söhbətimiz oldu. Dedim ki, Namiq, artıq evlənmək barədə düşünməlisən. Bu gün-sabah 35 yaşın olacaq. Namiq isə dedi ki, inşallah, 35 yaşına qalmaram, evlənmək haqqında fikrim ciddidir. Yəni onun sözündən başa düşdüm ki, Namiq bu il evlənməyi düşünür. Ona görə də şou-biznes əhli toya hazırlaşsa, pis olmaz" söylədi.
İstirahət, evlilik hazırlığı ilə yanaşı, meyxanaçı yaradıcılığı ilə də məşğuldur. Debüt işbirliyinə Könül Kərimova ilə başlayan Qaraçuxurlu, daha sonra xalq artisti Aygün Kazımova ilə duet ortağı oldu. Hərçənd bu işbirliyi sonradan şəxsi münasibətlərlə daha çox diqqət çəkdi. Aygünlə ayrıldıqdan sonra başqa bir sənətçi ilə duet oxumaq barədə düşünmədiyini desə də, bu vəd çox uzun çəkmədi. Budəfəki duet ortağı xanım sənətçi olmayacaq. Meyxanaçı yeni mahnısını Murad Sadıqla oxumağa qərar verib. Güman ki, Namiqlə Muradın bu duet parçasına klip də çəkilsin.
|
