Şoular mühitindən bəzilərini toplantılarda mühafizəçi ilə görmək mümkündür. Məsələn, Vasif Məhərrəmli. Gündəlik həyatında mühafizəçi ilə gəzmədiyini deyən ifaçı mühafizəçinin xidmətindən yalnız harayasa gedəndə istifadə edir. "Bu zaman mühafizəçim Rövşən yanımda olur. O, peşəkar kikboksçudur və çoxlu sayda beynəlxalq nailiyyətləri var. İdman dünyasında Rövşəni çoxları tanıyır", - deyə Vasif Məhərrəmli onu təqdim edir. Samiranı isə həyat yoldaşı və ya yaxın qohumu ilə görmək mümkündür: "Mən qismətə çox inanıram. Alnımıza yazılanı dəyişmək mümkün deyil. Amma hər zaman diqqətli, ehtiyatlı olmaq lazımdır. Təəssüf ki, toylarda spirtli içkidən sonra bəzi qonaqlar həyasızlıq edir". Səməd Səmədov isə hesab edir ki, indi əksər müğənnilərin toylara mühafizə ilə getməsinin səbəbi başqadır: "Bu, sadəcə, dəb halını alıb. Uitni Hyüstonun çəkildiyi "Cangüdən" filmini xatırlayırsınız? Deyəsən, əksər ulduzlarımız özünü Uitni Hyüstonun yerində təsəvvür edir. Amma ciddi danışsaq, artistlərimizin mühafizəçiyə ehtiyacı var. Bu halda daha rahat olursan". S.Səmədov özü isə mühafizəçisiz gəzir. Gənc ifaçı Gülay Zeynalovanı belə yerlərdə həyat yoldaşı Kamil ilə birgə görmək mümkündür. O, sanki xanımının mühafizəçisi rolunu da yerinə yetirir. Kamil idmançıdır. Rəhim Rəhimli də mühafizəçi ilə görünən ifaçılardandır. "Mən bütün tədbirlərə, toylara, konsertlərə həm köməkçi, həm də mühafizəçi rolunu oynayan etibarlı insanların əhatəsində gedirəm. Toylarımızın necə keçdiyini bilirik. Təəssüf ki, spirtli içki hamıya eyni cür təsir göstərmir", - deyə R.Rəhimli bildirdi. Səidə Sultan isə tək gedir və mühafizəçiyə ehtiyac duymadığını bildirir. Amma gedəcəyi yeri diqqətlə seçir. Səidə bildirir ki, indiyədək onu hər yerdə hörmət və gülərüzlə qarşılayırlar. Elnur əksər tədbirlərə tək qatılsa da, tez-tez mühafizəçiyə də müraciət etməli olur: "Məsələn, rayonlara və ya xaricə gedirəmsə, mütləq mühafizəçiyə müraciət edirəm".
|
