"Azərbaycanda şou-biznes, demək olar, yoxdur. Musiqi dünyasında bütün bu baş verənləri bəlkə də şou adlandırmaq olar. Amma maddi tərəfdən yanaşsaq, bu iş düşünüldüyü qədər də inkişaf etməyib".
Azərin müasir şou-biznesin durumuna toxunarkən qeyd edir ki, kənardan baxdıqda Azərbaycanda şou-biznesin varlığına dair hansısa fikir söyləmək mümkündür. Lakin həqiqətdə mənzərə fərqlidir: "Mən neçə illərdir bu sahədə çalışan adam kimi deyə bilərəm ki, Azərbaycanda şou-biznesin qərarlaşmasına hələ çox zaman lazımdır".
"Şou-biznes" anlayışı Azərbaycanda yeni simaların televiziya məkanına yol tapmasına imkan yaratdı. Bu gənclər sənətin vacibliyini düşünmədən tez-tez efirdə görünməklə seyrçini onu yaddaşına yazmağa məcbur edir. Təəssüf ki, bu isimlər sənəti, səsi ilə deyil, qalmaqallar və şayiələrlə yadda qalır. Azərin isə hesab edir ki, səhnəyə çıxan insan ilk növbədə məsuliyyətini dərk etməli, seyrçini aldatmadan sənətini sərgiləməlidir:
"Mən yeni mahnılar yazdırıram. Səmimi deyim ki, bəzən dincəlməyə vaxt olmur. Bəzilərindən fərqli olaraq işlə məşğul olmağa üstünlük verirəm. Boş söz-söhbətlərdən qaçaraq sənətlə məşğul olmaq mənim üçün daha önəmlidir. Açığı, tez-tez efirdə görünməyin də tərəfdarı deyiləm. Seyrçi qarşısına qalmaqallarla deyil, yeni layihələr, mahnılar, Türkiyə telekanalından yayımlanan proqramla çıxmağa üstünlük verirəm".
Qalmaqallardan qaçdığından heç qalmaqal da ona yaxın gəlmir. "Mən səhnəyə sənətlə gəlmişəm. Ona görə də bu kimi hallar mənə yaddır", - deyə o əlavə edir.
Musiqi yarışmaları vüsət almaqdadır. Lakin bu yarışmaların qalibləri üçün qazana biləcəkləri son zirvə - toylarda oxumaqdır. Müsabiqələrin məqsədi isə heç də toy müğənnisi yetişdirmək deyil. Gənc istedad sorağında olan yarışma təşkilatçıları şadlıq evləri və restoranların sərhədini aşaraq beynəlxalq müsabiqələrə iştirakçı göndərməyi qarşıya məqsəd qoymalıdır. Azərin bu iradla razılaşır və hesab edir ki, toy sənətçi üçün yüksək zirvə hesab edilməməlidir. Deyir:
"Lakin burada başqa bir məqam da var. Axı sənətçilər də yaşamalıdır. Əgər Azərbaycan incəsənətində konkret sistem olarsa, o zaman sənətçi toylara üz tutmaz. Avropa ifaçıları konsertləri ilə, albomlar hazırlamaqla pul qazana bilir. Təəssüf ki, biz hələ bu səviyyəyə çatmamışıq".
Gənc ifaçıların beynəlxalq müsabiqələrə hazırlanmasına gəlincə, sənətçi hesab edir ki, bu məsələ dövlətin yardımı olmadan gerçəkləşə bilməz: "Burada kifayət qədər böyük maddi və mənəvi dəstək olmalıdır. Ona görə də dövlətin yardımı qaçılmazdır".
Azərin bir müddət əvvəl təxirə salınmış solo konsertini gerçəkləşdirmək niyyətindədir:
"Hələ ki, vaxtı dəyişdirilib. Lakin bu mənə daha rəngarəng konsert proqramı ilə çıxış etməyə imkan verəcək. Xatırlayırsınızsa, ilk konsertimin repertuarı ikincidən ciddi surətdə fərqlənirdi. Bu konsertin isə daha fərqli olmasını qarşıya məqsəd qoymuşam. Digər tərəfdən, mahnılarımı bir günün içində hazırlamıram, bəzən onların üzərində 2-3 ay işləmək lazım gəlir. Ona görə də tələsmirəm. Tam repertuar yığdıqdan sonra tamaşaçılarımı bir araya gətirəcəyəm".
|
