Ümumi təhsil müəssisələrində vakant yerlərə müəllimlərin işə qəbul imtahanları davam edir. Təhsil Nazirliyindən verilən açıqlamaya görə, ibtidai sinif müəllimi ixtisası üzrə iyulun 26-dan iyulun 30-dək davam edən imtahanlarda 1244 iddiaçı iştirak edib. Nəticələrə əsasən, 98 nəfər işə qəbul olunub. Vakant qalan 12 yer isə bütün imtahanlar başa çatdıqdan sonra keçid balını toplamış, lakin qəbul olunmamış müəllimlərə təklif olunacaq.
Avqustun 1-dən ingilis dili ixtisası üzrə imtahanlara başlanıb. Bu ixtisas üzrə 241 vakant yer üçün (onlardan 68-i Bakı şəhərindəndir) 1529 nəfər imtahana buraxılıb.
Növbəti həftə Azərbaycan dili və ədəbiyyat, daha sonra isə kimya, tarix, biologiya, fizika, riyaziyyat, informatika, coğrafiya, musiqi və nəğmə, təsviri incəsənət, gənclərin çağırışaqədərki hazırlığı, əmək hazırlığı və fiziki tərbiyə fənləri üzrə imtahanlardır.
İşə qəbulla bağlı iyulun 1-dən 15-dək davam edən I mərhələdə ölkə üzrə 2177 vakant yerə 10 min iddiaçı elektron ərizə verib. Ərizəçilərin təhsil və nailiyyət göstəricilərinin müəyyənləşdirilmiş meyarlar əsasında kompüter proqramı vasitəsilə qiymətləndirilməsi aparılıb. Nəticədə 8700 iddiaçının ərizəsi təsdiq edilib və onlar müsabiqənin II mərhələsinə buraxılıb.
Bu il ibtidai sinif müəllimi ixtisası üzrə ərizə verənlərin sayı daha çox olub. Bu ixtisas üzrə 110 vakant yer üçün (23-ü Bakı, digərləri - rayonlar) 1722 nəfər ərizə verib. Azərbaycan dili və ədəbiyyat, riyaziyyat, ingilis dili, kimya, biologiya ixtisasları üzrə də ərizə verənlərin sayı az olmayıb. Hazırda namizədlər müsabiqənin II mərhələsi üzrə test imtahanında iştirak edirlər.
Xatırladaq ki, indiyədək 3 min nəfərə yaxın müəllim müsabiqənin II mərhələsində imtahan verib.
|
