İyul ərzində Dövlət Miqrasiya Xidmətinə (DMX) əcnəbilər və vətəndaşlığı olmayan şəxslər tərəfindən 4004 müraciət daxil olub. Müraciətlər ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin verilməsi, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, əmək fəaliyyəti üçün fərdi icazələr və mövcud fərdi icazə müddətlərinin uzadılması ilə bağlı olub. Müraciətlərin hər biri ayrı-ayrılıqda ölkə qanunvericiliyinin tələblərinə uyğun olaraq araşdırılmış və müvafiq qərarlar qəbul edilib, deyə DMX-dən bildirilir.
DMX tərəfindən görülmüş tədbirlər nəticəsində 1241 əcnəbi tərəfindən inzibati qanunvericiliyin pozulması halları müəyyən edilib, onlardan 171 nəfərinin cərimə tətbiq edilməklə ölkə ərazisində yaşamaları leqallaşdırılıb, 852 əcnəbi barəsində İnzibati Xətalar Məcəlləsinin müvafiq maddələri ilə nəzərdə tutulmuş qaydada 48 saat ərzində ölkəni tərk etmə, 218 əcnəbinin isə inzibati qaydada ölkə hüdudlarından kənara çıxarılması barədə qərarlar qəbul edilib.
|
