Avqustun 4-də Gürcüstanın regional inkişaf və infrastruktur naziri Ramaz Nikolaişvili bu ölkədə həyata keçirilən prioritet layihələr barədə fikirlərini səsləndirib (APA). Nazir çıxışında Bakı-Tiflis-Qars (BTQ) dəmiryol xəttinin çəkilişinə də önəm verib. Onun sözlərinə görə, keçən il layihəyə qoyulan investisiya 912 milyon lariyə çatıb və 31 min nəfər işlə təmin olunub. Bu ilin sonuna qədər nazirlik 44,4 min nəfəri işə qəbul edəcək və investisiyanın həcmi 1,386 milyard lari olacağı planlaşdırılır və 62,5 min nəfərin işlə təmin olunacağı gözlənilir. Nikolaişvili bildirib ki, Gürcüstanda olan 7 min km dəmiryoldan 3 min km-i reabilitasiya olunub. BTQ layihəsinə görə, Gürcüstanda 25 km-lik xətt çəkiləcək və 160 km reabilitasiya olunacaq. Xatırladaq ki, Azərbaycan yolun Gürcüstan ərazisinə düşən hissəsi üçün "Marabda-Kartsaxi Dəmir Yolları" MMC-yə güzəştli şərtlərlə (illik 1%-lə 25 illiyə) 200 milyon ABŞ dolları məbləğində kredit ayırıb. Bu vəsait hesabına Gürcüstan ərazisində 29 km uzunluğunda yeni yol, Türkiyə ilə sərhəddə təkər dəyişmə məntəqəsi tikiləcək, köhnə yol rekonstruksiya olunacaq. Layihənin ümumi dəyəri isə 600 milyon dollardan artıqdır. BTQ Azərbaycan Neft Fondunun maliyyə dəstəyi ilə çəkilir.
|
