Röya bu günə qədər ekran həyatı görən iki klipini uğursuz hesab edir. Bunlar "Sənə görə" və "Solğun günlərim"dir. Hər iki mahnının klipini aşağı səviyyəli ekran işi adlandırıb. "Həmin klipləri ölkədən kənar çıxararaq, qonşu ölkələrin televiziyasında yayımlamaq mənə ağır gəlir. Qərara gəlmişəm ki, hələlik azərbaycanlı rejissorlara klip çəkdirməyim. Çünki istədiyim keyfiyyəti ala bilmirəm", - deyə bildirir. Odur ki, yeni kliplərini türkiyəli rejissorlara həvalə edəcək. Uğursuz adlandırdığı "Solğun günlərim" mahnısı üçün Türkiyədən təklif aldığını qeyd etdi. Mahnıya ikinci ekran həyatı vermək istəyən rejissorlardan biri ona müraciət edib. Rejissor klipdə məşhur türk aktyorlarından birinin də çəkiləcəyini vəd edib. Hazırda danışıqlar getdiyindən Röya təfərrüatlara varmaq istəmədi.