Milli estradanın korifeylərindən olan xalq artisti Flora Kərimova şəhərin özəl klinikalarından birində gözündən cərrahiyyə əməliyyatı olunub. Hazırda özünü normal hiss edən müğənni bildirib ki, əməliyyat uğurlu keçib və narahatlığı qalmayıb. "Gözümdə aparılmış uğursuz əməliyyata görə mən yenidən əməliyyat olunmalıydım. Amma hər dəfə bir iş çıxır, əməliyyata getmirdim. Nəhayət, gözlənilən əməliyyat bu günlərdə keçirildi. Əməliyyat çox rahat və gözəl şəraitdə keçdi. Klinikaya atdığım ilk addımdan etibarən həm həkimlərdən, həm də xəstələrdən böyük qayğı gördüm. Klinikanın bütün heyətinin hörmət və qayğısı ilə əhatə olundum. Mən klinikanın baş həkiminə, əməliyyat aparan Dilqəm həkimə minnətdarlığımı bildirirəm. Və xüsusi qeyd etmək istəyirəm ki, əməliyyat təmənnasız həyata keçirildi. Məndən bir qəpik də pul almadılar. Çox sevinirəm ki, millətimiz sənətkara hörmət hissini itirməyib". Flora Kərimova bildirdi ki, klinikada ona özünə və qızına həsr olunmuş "Nigaranam" adlı kitab da hədiyyə olunub. Kitabın müəllifi Ceyhun Lətafətdir. Sənətçi əməliyyat olunduğunu övladlarından və qohumlarından gizlətdiyini də deyib: "Düzdür, əməliyyatdan o qədər də qorxmurdum, amma bunu övladlarımdan və qohum-əqrəbamdan gizlətdim. Mətbuatdan oxuyandan sonra hamısının xəbəri olacaq. Yeri gəlmişkən, mən bütün mətbuat işçilərinə, məni yubileyim münasibətilə təbrik edən hər kəsə də öz təşəkkürümü bildirirəm". Hər iki gözünün alt və üst qapağında əməliyyat keçirən F.Kərimova onu da qeyd edib ki, şiş çəkilənə, gözləri təbii halını bərpa edənə qədər hələ bir müddət eynəklə gəzəcək: "Amma sonra eynəyimi çıxaracam. Çünki özüm də gözlərim üçün darıxmışam". Qeyd edək ki, bu, Flora Kərimovanın gözlərində aparılan sayca üçüncü əməliyyatdır.
|
