Bir sıra ərzaq məhsullarında qiymət artımı müşahidə edilməkdədir. Son zamanlar paytaxt mağazalarında və topdansatış məntəqələrində qəndin, şəkər tozunun qiyməti 15 faizədək bahalaşıb. Buna paralel iyun ayında diri heyvan və heyvandarlıq məhsullarının da qiymətləri 0,1 faiz qalxıb. Artımlar şəkər tozunda olduğu kimi, istehsalçı qiymətlərinin 3,5 faiz artması nəticəsində baş verib. Diri heyvan və heyvandarlıq məhsullarından iribuynuzlu mal-qaranın istehsalçı qiymətləri 3,2 faiz, inəyin 0,4 faiz, erkək buzovun 0,9 faiz, ana qoyunun 0,3 faiz, inək südünün istehsalçı qiymətləri 16,2 faiz, diri balığın istehsalçı qiymətləri 2,0 faiz bahalaşıb. Bu tendensiyaya münasibət bildirən iqtisadçı-alim Vüqar Bayramov deyir ki, Azərbaycanın ərzaq bazarında gedən prosesin əksinə dünya bazarında ucuzlaşma müşahidə edilməkdədir. Onun qənaətincə, bizim ölkədə bir sıra məhsulların bahalaşması qiymətlərin bazar tərəfindən tənzimlənmədiyindən xəbər verir. Bahalaşan məhsulların əksər hissəsinin xaricdən idxal edildiyini və xarici ölkələrdə qiymət artımlarının baş vermədiyini nəzərə alsaq, o zaman son qiymət artımları sünidir. Son bir neçə ayda şəkər tozunun qiyməti 15 faiz artıb. Halbuki dekabrın sonunda dünya bazarında şəkər tozu 62 sent, iyulun 1-də isə 53 sent olub. Yəni son 6 ayda dünya bazarında şəkər tozunun qiyməti 15 faiz ucuzlaşıb.
Yayda ət məhsullarının bahalaşmasına gəlincə, V.Bayramov bu məhsulun da dünya bazar qiymətlərində artım olmadığını qeyd edir:
"Böyük Britaniyada qoyun ətinin qiyməti 4,60 man, qonşu Gürcüstanda isə 3 manat təşkil edir. Azərbaycanda isə bu rəqəm... 8 manata yaxındır. Ölkədə ərzaq məhsullarının qiymətləri ilə digər ölkələrdəki qiymətlərin müqayisəsi göstərir ki, artım sünidir. Heç bir halda qiymət qonşu ölkədəki qiymətdən 2,5 dəfə çox ola bilməz".
O hesab edir ki, İİN süni qiymət artımlarına qarşı mübarizəni genişləndirməlidir. O bildirir ki, bahalaşma əməkhaqqı artımlarından əvvəl baş verib:
"Bu ondan xəbər verir ki, Azərbaycanda büdcədən maliyyələşən işçilərin əməkhaqlarında artım olacaq. Əməkhaqqı artımlarından sonra qiymətlərin yenidən bahalaşması gözləniləndir. Sentyabr ayından digər məhsullar da bahalaşa bilər. Nəticədə 2011-ci ildə ciddi inflyasiya qeydə alınacaq".
İqtisadçı cari ildə inflyasiyanın 15 faizdən çox proqnozlaşdırıldığını vurğulayır.
|
