"Bu gün ölkədə qida zəhərlənməsi daha çox gübrə ilə yetişdirilən qarpız və digər bostan məhsullarından qaynaqlanır". Bunu Azərbaycan səhiyyə nazirinin müavini Elsevər Ağayev deyib.
Havaların kəskin isti keçməsi ilə bağlı qidadan zəhərlənmə riskinin artdığını etiraf edən Elsevər Ağayev eyni zamanda qeyd edib ki, indi ölkədə qida zəhərlənməsinə görə ciddi ajiotaj yoxdur: "Səhiyyə Nazirliyi vəziyyətə nəzarət edir". Nazir müavini deyib ki, mümkün fəsadlardan yayınmaq üçün insanlar təlimatlandırılır, tibbi müəssisələrə lazımi tapşırıqlar verilib.
Xırdalan şəhərində isə keyfiyyətsiz sərinləşdiricilər istehsalı ilə məşğul olan müəssisəyə 7,6 min manat maliyyə sanksiyası tətbiq edilib. Azərbaycan İqtisadi İnkişaf Nazirliyindən verilən məlumata görə, Abşeron rayonu, Xırdalan şəhəri, H.Əliyev küçəsi, ev 50 ünvanında "Cem" MMC-yə məxsus istehsalat sahəsində aparılan yoxlama zamanı "Bonjus" və "Lili" əmtəə nişanlı aromatlaşdırılmış sərinləşdirici içkilərin müvafiq reseptura olmadan istehsal edilməsi, "Lili" əmtəə nişanlı sərinləşdirici içkilərin etiketində məhsulun keyfiyyət və təhlükəsizlik göstəricilərini ifadə edən normativ sənədin göstərilməməsi, habelə "Bonjus" əmtəə nişanlı sərinləşdirici içkilərin etiketlərində saxlama temperaturunun və qida dəyərində üzvi turşuların miqdarının qeyd edilməməsi səbəbindən "Cem" MMC barəsində İİN Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən antiinhisar qanunvericiliyinin tələblərinin pozulması əlamətləri üzrə iş qaldırılıb.
Dövlət Xidmətində istehlakçıları çaşdırmaqla haqsız rəqabətə yol verilməsi ilə bağlı işə baxılmış və haqsız rəqabət haqqında qanunun tələblərini pozduğuna görə "Cem" MMC-yə 7,6 min manat maliyyə sanksiyası tətbiq edilib.
|
