Bakının Binəqədi, Suraxanı rayon, Sumqayıt şəhər və daha bir neçə rayonunun hərbi komissarları barəsində cinayət işi başlanıb. Bu barədə dünən Respublika Hərbi Prokurorluğunda kollegiya iclasında hərbi prokuror Xanlar Vəliyev danışıb. O qeyd edib ki, hərbi komissarlıqlarda aparılmış yoxlamalar nəticəsində bir sıra hallarda çağırışçıların hərbi xidmətə çağırışdan əsassız azad edilmələri, onlara hərbi həkim komissiyalarının rəyinə əsasən qanunsuz möhlət verilməsi və valideynlərindən rüşvət alınması ilə bağlı cinayət işləri başlanıb və istintaqı davam etdirilir.
Açıqlanan rəqəmlərə görə, Respublika Hərbi Prokurorluğunun təhqiqat orqanlarının fəaliyyətində qanunların icrasına dair 73 yoxlama keçirilib, nəticədə 965 qanun pozuntusu aşkar edilib, qanun pozuntularını doğuran səbəb və şəraitin aradan qaldırılması üçün 166 təqdimat göndərilib, 68 nəfərə xəbərdarlıq edilib, 37 cinayət işi başlanıb, təhqiqat orqanlarının icraatında olan işlər üzrə 58 yazılı göstəriş verilib. Ötən müddət ərzində Respublika Hərbi Prokurorluq orqanları korrupsiya və rüşvətxorluq hallarına qarşı mübarizə sahəsində müvafiq işlər görərək 58 fakt üzrə cinayət işi başlayıb.
Xanlar Vəliyev bildirib ki, hərbi prokurorluq orqanları "mütəşəkkil cinayətkarlığın ən təhlükəli təzahürlərindən biri olan korrupsiya cinayətlərinə" qarşı mübarizə sahəsində fəaliyyətini daha da gücləndirib, bu da mənimsəmə, israfçılıq, rüşvətxorluq, vəzifədən sui-istifadə etmə və digər cinayətlərin vaxtında aşkar olunmasına, cinayət törətmiş şəxslərin layiqli cəzaya məhkum edilməsinə şərait yaradıb.
Xanlar Vəliyev bildirmişdir ki, ermənilərin Azərbaycan xalqına qarşı törətdikləri əməllərlə bağlı başlanmış cinayət işləri üzrə intensiv istintaq-əməliyyat tədbirləri davam etdirilir. Bu sıradan Xocalı, Qaradağlı, Meşəli, Bağanıs-Ayrım faciələri, terror, habelə əsir düşmüş şəxslərə işgəncə verilməsi və erməni silahlı qüvvələrinin törətdikləri digər cinayət əməlləri Cinayət Məcəlləsinin soyqırımına görə məsuliyyəti nəzərdə tutan 103-cü və digər maddələri ilə istintaq olunaraq cinayət işi üzrə 287 təqsirləndirilən şəxs barəsində axtarış elan edilib.
|
