Qafqaz Müsəlmanları İdarəsinin(QMİ) Qazılar Şurası Müqəddəs Ramazan ayı ilə bağlı fətva verib. Bu məqsədlə iyulun 28-də QMİ-də toplantı keçirilib. Bildirilib ki, Ramazan ayının ilk günü avqustun 1-də başlayır və iyulun 31-i niyyət gecəsidir. QMİ oruc tutanlara kömək məqsədilə Şamaxı Astrofizika Rəsədxanası ilə birlikdə xüsusi cədvəl və yaddaş kitabçası hazırlayıb.
Ramazan ayı 11 ayın sultanı, Qurani-şərifin nazil olduğu aydır. Bu ayda müsəlmanların borcu oruc tutmaqdır. Ramazan bayramının məqsədlərindən biri müsəlmanların bir yerə toplaşması, bir yerdə namaz qılıb, ibadət etməsidir. Oruc ibadətlərini bitirdikdən sonra müsəlmanlar iftar süfrəsində bir yerə yığışırlar. Bu ayın özəlliklərindən biri də müsəlmanların bir-birini ziyarət etməsi, qohum-əqrəbaların görüşməsi, arada inciklik varsa, barışmasıdır. Bayramda yoxsul, kasıb müsəlmanlar da sevinməli, bayramı digərləri kimi keçirməlidir. Bunun üçün imkanlı şəxslər bacardıqları qədər yoxsullara, ehtiyacı olanlara əl tutmalıdır. Buna görə fitrə zəkatı buyurulmuşdur ki, yoxsul müsəlmanlar da bayram edə bilsinlər.
Orucluq bir ay davam edir. Bu ayda xəstə və ya səfərdə olanlar tutmadığı günlər qədər başqa günlərdə oruc tutmalıdır. Oruc tuta bilməyənlər isə hər günün əvəzində bir yoxsulu doyduracaq qədər fidyə verməlidir. Həm oruc tutub, həm fidyə vermək daha xeyirxah əməl sayılır.
Ramazan ayı insanlara öz iradə qüvvələrini, dözümlüyünü yoxlamaq imkanı verir. Onları xeyirxahlığa, ədalətə, mehribanlığa səsləyir. Oruc Ramazan ayında tutulduğu üçün ona "Ramazan orucu" da deyirlər. Orucluq ayında günün işıqlı vaxtı yemək, içmək, siqaret çəkmək, ər-arvad borcunu yerinə yetirmək və s. olmaz. Bunlardan yalnız uşaqlar, xəstələr, hamilə qadınlar, cəbhədə vuruşanlar, uzaq yola çıxanlar azad olunur. Orucu qəsdən pozanlar isə onun əvəzini tutmaqla yanaşı, tövbə etməli və kəffarəsini ödəməlidir. Kəffarə isə 60 gün oruc tutmaq, yaxud 60 yoxsulu yedirtməkdir. 60 günlük kəffarə orucuna bir günlük qəza orucu da əlavə olunur.
Orucluğun başa çatdığı gün fitr bayramı adlanır. Bu il fitr bayramı miladi təqvimlə avqustun 30 və ya 31-nə təsadüf edəcək. Həmin gün İslam aləmində böyük bayram günü hesab olunur və müsəlmanlar bir-birini təbrik edir, vəfat edənlərin qəbri ziyarət olunur. Bayram günü hər kəs öz himayəsində olanlar üçün təqribən 3 kq buğda, yaxud xurma və ya kişmiş miqdarında kasıblar üçün fitrə zəkatı verməlidir.
Bu ayda insanlar qəbul etdikləri qidalara xüsusi diqqət yetirməlidir. Ağır yeməklərdən uzaq olmalı, xüsusilə toyuq və balıqdan hazırlanan yeməklərə, sulu və yüngül yeməklərə üstünlük verməlidirlər. Günün qızmar saatlarında çölə çıxmaq da sağlamlıq üçün təhlükə yarada bilər.
|
