Rezidentura tətbiq edilənə qədər başqa ölkələrdə tibbi təhsil almış tələbələrin diplomları Azərbaycanda tanınacaq. Ancaq bu, müəyyən müddətdən sonra baş verəcək (APA). Bu açıqlama-xəbərdarlığı səhiyyə nazirinin müavini Elsevər Ağayev səsləndirib. Nazir müavini vurğulayıb ki, bu mərhələdən sonra xaricdəki tibbi təhsil ocaqlarında müəyyən ixtisaslara yiyələnmiş şəxslərin diplomları tanınmayacaq. Elsevər Ağayev bunu Azərbaycanın özünün müstəqil və konseptual təhsil sisteminə üstünlük verməsi ilə əsaslandırıb:
"Azərbaycan artıq yeni təhsil sisteminə keçib və cari ilin sentyabr ayında rezidenturaya imtahanlar keçiriləcək". Onun sözlərinə görə, rezidentura imtahanlarına həm Səhiyyə Nazirliyi, həm də Nazirlər Kabineti tam hazırdır.
Bundan başqa, ali məktəblərə qəbul imtahanlarının getdiyi bir məqamda lazımi bal toplaya bilməyənlərə xaricdən təkliflər edilir. Öz növbəsində TQDK sədri Məleykə Abbaszadə valideynlərə xəbərdarlıq edir: "Ukraynada, Türkiyədə, Rusiyada Azərbaycan abituriyentlərini özünə çəkən dələduzlar var". Abbaszadə sözlərinə əlavə edir: "Ukrayna universitetləri bizim abituriyentlərin ovuna çıxıb" (APA).
Abbaszadə qeyd edib ki, Ukraynada, Türkiyədə, Rusiyada Azərbaycan abituriyentlərini özünə çəkən dələduzlarla rəftarda valideynləri ehtiyatlı olmağa çağırıb:
"Mənim telefonuma belə bir mesaj gəlib. Mesajda yazılıb ki, Türkiyə universitetində imtahansız ali təhsil almaq mümkündür. Yəqin ki, bu mesaj başqalarının da telefonuna gəlib. Oxuyub güldüm. Hər kəs bilir ki, Türkiyə ali təhsil ocaqlarına qəbul olmaq nə qədər çətindir. Belə olan halda, necə ola bilər ki, Bakıdan Türkiyə universitetinə qəbul bu qədər asan ola bilər?".
Məleykə Abbaszadə bildirib ki, xaricdə ali məktəb adı altında təqdim olunan məktəblərin çoxu əslində adi kurslardır.
|
