Bu həftə Çempionlar Liqasında (ÇL) III təsnifat mərhələsinin ilk oyunlarına yekun vuruldu. Maraq doğuran görüşlər içərisində "Dinamo" (Kiyev) - "Rubin", "Reyncers" - "Malmö", "Tvente" - "Vasluy" və "Benfika" - "Trabzonspor" və nəhayət, "Dinamo" (Zaqreb) - HİK qarşılaşmalarını qeyd etmək olar.
Azərbaycan futbolsevərlərinə yaxşı tanış olan "Tvente" və "Malmö" qələbə qazandıqları halda, "Dinamo" (Kiyev) gözlənilmədən öz meydanında "Rubin"ə 0:2 hesabı ilə məğlub olub.
Ötən mövsüm "Qarabağ"ın Avroliqanın III təsnifat mərhələsində mübarizədən kənarlaşdırdığı "Visla" (Polşa) klubu isə səfərdə Bolqarıstan "Liteks"inə qalib gəlməyi ilə diqqət çəkib.
Az əvvəl "Neftçi"ni mübarizədən kənarlaşdıran "Dinamo" (Zaqreb) klubu isə ötən mərhələdə 10:0 hesabı ilə qalib gəlməklə ÇL tarixinə ən böyük hesablı qələbənin səbəbkarı kimi düşən Finlandiya HİK-nin qonağı olub. Zaqreblilər daha bir mərhələ adlamağa çox yaxındırlar. Hər halda, finlərin səfərdəki cavab oyununda ən azı 2:0 hesabı ilə qalib gəlməli olduqlarını nəzərə alsaq, "Dinamo" qarşısında duran vəzifəni böyük ölçüdə həll edib.
Gürcüstan çempionu "Zestafoni" isə "Şturm"la ev oyununda hesabda irəli çıxsa da, az sonra buraxdığı qolla üstünlüyünü əldən verib. İndi gürcülər mərhələ keçmək üçün Avstriyadakı cavab görüşündə ən azı məhsuldar bərabərliyə nail olmalıdır. Təbii ki, "Trabzonspor" klubunun oyunu da futbolsevərlərimizin diqqət mərkəzində olub. Türkiyə vitse-çempionu Portuqaliyanın ən titullu klublarından olan "Benfika" ilə çətin səfər oyununa çıxıb. "Trabzonspor" Avroliqanın son mövsümündə yarımfinala kimi irəliləyən rəqibinə son 20 dəqiqədə təslim olub. Belə ki, həmin vaxt rəqibin müqavimətini qıraraq 2 qol vuran "Benfika" mərhələ adlamaq şansını yüksəldib. İndi "Trabzonspor" çılğın azarkeşləri qarşısında cavab oyununda mərhələ keçmək üçün böyük hesabla qalib gəlməlidir ki, bu, heç də asan olmayacaq. "Zestafoni" (Gürcüstan) - "Şturm" (Avstriya) - 1:1 Gelaşvili, 74 - Volf, 78. "Ekranas" (Litva) - BATE (Belarus) - 0:0 APOEL (Kipr) - "Slovan" (Slovakiya) - 0:0 "Liteks" (Bolqarıstan) - "Visla"(Krakov, Polşa) - 1:2 Vellinqton, 45 - Lamey, 19, Melikson, 76. "Dinamo" (Kiyev, Ukrayna) - "Rubin" (Rusiya) - 0:2 Kaseyv, 6, Natço, 68. "Genk" (Belçika) - "Partizan" (Serbiya) - 2:1 Vossen, 70, Ogunjimi, 90 - Tomiç, 65. "Reyncers" (Şotlandiya) - "Malmö" (İsveç) - 0:1 Larsson, 18. "Tvente" (Hollandiya) - "Vasluy" (Rumıniya) - 2:0 Janko, 34, 57.
HİK (Finlandiya) - "Dinamo" (Zaqreb, Xorvatiya) - 1:2 Rinq, 14 - Rafinya, 19 (avtoqol); Sammir, 77 "Kopenhagen" (Danimarka) - "Şamrok Rovers" (İrlandiya) - 1:0 Ottesen, 4. "Odense" (Danimarka) - "Panatinaikos" (Yunanıstan) - 1:1 T. Reqiniussen, 90 - Leto, 47. "Makkabi" (Hayfa, İsrail) - "Maribor" (Sloveniya) - 2:1 Dvalişvili, 8-pen, Yampolski, 70 - Markos, 27. "Standart" (Belçika) - "Sürix" (İsveçrə) - 1:1 Qonsales, 90 - Mehmedi, 79. "Rusenborq" (Norveç) - "Viktoriya" (Çexiya) - 0:1 Pilarj, 33. "Benfika" (Portuqaliya) - "Trabzonspor" (Türkiyə) - 2:0 Nolito, 71, Qaytan, 88.
Qeyd edək ki, bu cütlüklər arasında cavab qarşılaşmaları avqustun 2-3-də keçiriləcək.
|
