Qərbi Azərbaycan əyalətinin Qarakilsə məntəqəsinə hər il dünya ermənilərinin "dini mərasimə" toplaşması bir adətə çevrilib. İyulun 21-də Qarakilsəyə "5 min xristian" (əslində erməni) gəlib. "İRNA"nın məlumatına əsasən, əyalətin Çaldıran rayonunda bununla bağlı əlaqələndirmə şurasının toplantısında rayonun rəhbəri Həmidrza Qulipur söyləyib.
Azərbaycandakı erməni kilsəsinin başçısı Meloyan Qərbi Azərbaycan əyaləti rəhbərliyinə himayəçiliyə görə təşəkkür edib. Keşiş saxtalaşdırılmış tarixdən və İslam Respublikası rəhbərliyinin etnik azlıqlara göstərdiiyi sayğıdan da danışıb:
"Qarakilsə kilsəsi Qərbi Azərbaycanda YUNESKO mədəni irs siyahısına düşmüş üçüncü tarixi abidədir. Ermənilər inanır ki, bu kilsənin yerində İsanın həvvarilərindən biri - Faddey dəfn olunub. Bu, İranda milli azlıqların haqqının qorunmasına bariz örnəkdir".
Ötən il iyulun 29-da Güney Azərbaycanın Urmiya şəhərində dünya ermənilərinin idman festivalının açılışı olmuşdu. 10 gün davam etmiş bu mərasim Urmiyanın Çarbaş məhəlləsində ermənilərə məxsus idman klubunda gerçəkləşdirilib. Festivalda Ermənistan, Livan, İran, İraq, habelə Avropa və Amerika ölkələrində yaşayan ermənilər iştirak etmişdi.
İranın Ermənistan səfiri Seyidəli Saqaian bildirib ki, Tehran Universiteti ilə İrəvan Universiteti arasında əldə edilmiş anlaşmaya əsasən, İran paytaxtanda Ermənişünaslıq Mərkəzi yaradılacaq. Bu tədbir "Ermənistan və İran İslam Respublikası arasında 2010-2013-cü illərdə elm, təhsil və texnologiyalar sahəsində əməkdaşlıq proqramı" çərçivəsində gerçəkləşdirilir.
Dünya Azərbaycanlılarının qurultayı keçirildikdən, yaxud dünya azərbaycanlıları ilə bağlı tədbirdən sonra bir qayda olaraq İran rəhbərliyi ermənilərə xoş münasibəti ilə bağlı bir mərasim təşkil edir. Tehran bununla Azərbaycan torpaqlarını işğal etmiş ermənilər vasitəsi ilə dünya azərbaycanlılarına acıq verdiyini zənn edir.
Bir müddət öncə erməni politoloqu Levon Məlik-Şahnazaryan belə bir bəyanatla çıxış etmişdi: "İranın Ermənistana Ermənistanın İrana möhtac olduğundan daha çox ehtiyacı var".
|
