Deyəsən, daha bir klub Azərbaycan Premyer Liqasında iştirakdan imtina edir. Bu, ölkənin ən titullu klublarından olan Gəncə "Kəpəz"idir. Komandanın növbəti mövsümə hazırlaşmasına və yoxlama görüşləri keçirməsinə baxmayaraq, Gəncə komandasının güclülər dəstəsində çıxış edəcəyi sual altındadır. Məsələ bundadır ki, komandanın sponsoru öhdəliyindən imtina edib və bu səbəbdən "Kəpəz"in Premyer Liqada çıxışı qaranlıq qalıb. Kluba yeni sponsor tapılmasa, "Kəpəz" elitada çıxış etməyəcək. Bu, növbəti mövsüm ərəfəsində artıq üçüncü belə haldır. Premyer Liqada oynamaqdan imtina edən ilk komanda "Abşeron" oldu. Ötən mövsümü birinci divizionun çempionu kimi bitirmiş bu komanda elitaya vəsiqə qazansa da, son anda sponsorlarla "dil tapa bilmədi" və nəticədə dağıldı. Əvəzində AFFA "Sumqayıt Şəhər" klubuna Premyer Liqada çıxış etmək hüququ verdi.
Bir neçə gün öncə isə "Muğan" növbəti mövsümdə Premyer Liqada çıxış etmək istəmədiyini rəsmi olaraq Peşəkar Futbol Liqasına (PFL) bildirdi. Belə olan halda PFL rəhbərliyi yenə birinci divizion klublarına müraciət ünvanladı ki, buna da ötən mövsümün nəticələrinə görə elitanı tərk etmiş və qaydalara əsasən, bu il birinci divizionda oynamalı olan "Simurq" müsbət cavab verdi. Lakin "Kəpəz" də Premyer Liqada oynamaqdan imtina edərsə, onu əvəzləyəcək klub da yoxdur. Çünki birinci divizionun yerdə qalan klublarının maliyyə imkanları elitada çıxış etmək üçün yetərli deyil. Bu üzdən də yeni mövsümdə 11 klubdan ibarət çempionatın keçirilməsi istisna olunmur.
|
