Göygöl rayonunda yerləşən hərbi hissədə bu ilin fevralında 7 əsgərin ölümü ilə nəticələnən hadisə ilə bağlı başlanan cinayət işi üzrə istintaq yekunlaşıb (APA). Bunu dünən Müdafiə Nazirliyində keçirilən mətbuat konfransında nazirliyin mətbuat xidmətinin rəisi, polkovnik Eldar Sabiroğlu deyib. Qeyd edib ki, artıq ibtidai istintaq yekunlaşıb və cinayət işinin materialları məhkəməyə göndərilib. Cinayət işinin məhkəmə istintaqına Gəncə Qarnizonu Hərbi Məhkəməsində baxılacaq. Hadisə bu il fevralın 20-də Müdafiə Nazirliyinin Göygöl rayonunda yerləşən N saylı hərbi hissəsində baş vermişdi. Hərbi hissədə xidmət edən əsgər avtomat silahından atəş açaraq öz xidmət yoldaşlarını qətlə yetirib. MN və Hərbi Prokurorluğun birgə yaydığı məlumatda bildirilib ki, hadisə zəminində Quliyev Naib Fəxrəddin oğlu (1992, Beyləqan RHK 04.2010), Cavadzadə Cavid Vəkil oğlu (1991, Mingəçevir RHK 01.2010), Suanverdiyev Nurlan Radfel oğlu (1991, Ağdam RHK 04.2010), Xocberov Ramazan Abdulla oğlu (1992, Balakən RHK 04.2010), Kərimov Əfqan Yaşar oğlu (1991, Balakən RHK 10.2009), Hüseynov Əhməd Əhmədalı oğlu (1992, Ağcabədi RHK 01.2010), Quliyev Zakir Etibar oğlu (1991, Yasamal RHK 01.2010) həyatlarını itiriblər. Faktla bağlı Cinayət Məcəlləsinin 120.2.7 (iki və daha çox şəxsi qəsdən öldürmə) maddəsi ilə cinayət işi açılmışdı və neçə aydan bəri istintaq gedirdi.
|
