Prokurorluqdan şikayətə iyulun 18-də baxılacaq

Həbsdə olan gənc fəal Bəxtiyar Hacıyevin zorakılığa məruz qalması ilə bağlı Baş Prokurorluğun apardığı araşdırmanın nəticəsindən Səbail Rayon Məhkəməsinə verilən şikayətə baxılması iyulun 18-nə təyin edilib. Məlumatı "Media forum" saytına vəkil Elçin Namazov verib. Proses Bəxtiyar Hacıyevin özünün də məhkəmə iclasında iştirakını təmin etmək məqsədilə təxirə salınıb.

Elçin Namazov qeyd edib ki, Bəxtiyar Hacıyev hazırda 3 saylı Şüvəlan İstintaq Təcridxanasında saxlanılır: "İyulun 19-da isə Bəxtiyar Hacıyevin hansı cəzaçəkmə müəssisəsinə göndərilməsi məsələsi həll olunacaq".

Harvard Universitetinin (ABŞ) məzunu olan Bəxtiyar Hacıyev martın 4-də həbs olunub. Mayın 18-də o, Gəncənin Nizami Rayon Məhkəməsinin hökmü ilə 2 il müddətinə azadlıqdan məhrum edilib. Universitet məzunu Cinayət Məcəlləsinin 321.1-ci (qanuni əsas olmadan hərbi xidmətdən yayınmaq üçün növbəti hərbi çağırışdan və ya səfərbərlik üzrə çağırışdan boyun qaçırma) maddəsi ilə təqsirli bilinir. Mart ayında Baş Prokurorluq İstintaqa Nəzarət İdarəsindən Gəncədəki 2 saylı təcridxanaya Bəxtiyar Hacıyevin şikayəti üzrə onun polis idarəsində və saxlanma təcridxanasında zorakılığa məruz qalıb-qalmadığını araşdırmaq üçün nümayəndələr göndərilib. Martın 28-də prokurorluq Bəxtiyar Hacıyevin döyülməsini təsdiqləməyərək cinayət işi başlanması ilə bağlı müraciəti rədd edib.

Bundan sonra Bəxtiyar Hacıyev Respublika Prokurorluğunun apardığı araşdırmanın nəticəsindən Səbail Rayon Məhkəməsinə şikayət verib.