Bu ilin 6 ayı ərzində Baş prokuror yanında Korrupsiyaya Qarşı Mübarizə İdarəsinə korrupsiya ilə bağlı 360-dan çox müraciət daxil olub. Müraciətlər əsasən rüşvət alma və vəzifədən sui-istifadə halları ilə bağlı olub.
Bu açıqlamanı Baş prokuror yanında Korrupsiyaya Qarşı Mübarizə İdarəsində bu ilin 6 ayı ərzində görülən işlərə dair hesabat toplantısında idarə rəisi Kamran Əliyev bildirib. Edilən müraciətlər əsasında 87 fakt üzrə cinayət işi başlanıb. İdarə rəisi ötən il bu rəqəmin 69 olduğunu açıqlayıb. Onun sözlərinə görə, 6 ay ərzində ötən ildəki faktlarla birgə korrupsiya halları ilə bağlı ümumilikdə 159 cinayət işi üzrə istintaq aparılıb, 98 şəxs barəsində 56 cinayət işi baxılmaq üçün məhkəmələrə göndərilib.
K.Əliyev deyib ki, əvvəlki illərlə müqayisədə bu il rüşvət alma və vəzifə səlahiyyətlərindən sui-istifadə halları daha çox olub. O, idarədə yaradılan 161 nömrəli "Qaynar xətt"ə daxil olan müraciətlərin statistikasını da açıqlayıb.
K.Əliyev deyib ki, "Qaynar xətt" yaradılandan sonra korrupsiya ilə bağlı 2000-dən çox məlumat daxil olub. Bundan başqa, xətt vasitəsilə müraciət edən 5000-dən çox vətəndaşa məlumatlar verilib. İdarə rəisi daxil olan 2000 müraciətlə bağlı 9 fakt üzrə cinayət işi başlandığını deyib. O da qeyd olunub ki, edilən hər bir müraciət araşdırılıb, bəzi vətəndaşların etdiyi şikayətlərin əsassız olduğu hallar da üzə çıxıb.
K. Əliyevin sözlərinə görə, əmək və əhalinin sosial müdafiəsi ilə bağlı daxil olan müraciətlər üstünlük təşkil edib.
Bundan başqa, Daxili İşlər Nazirliyi ilə bağlı 270, yerli icra orqanları ilə bağlı 198, bələdiyyələrlə bağlı 128, təhsillə bağlı 99, əhalinin enerji təchizatı ilə bağlı 53, gömrük xidməti ilə bağlı 48, özəl sektorla bağlı 38 müraciət daxil olub.
K.Əliyev müraciətlərin hər birinin obyektiv araşdırıldığını, korrupsiyaya qarşı qətiyyətlə mübarizə aparıldığını, bu tədbirlərin bundan sonra da davam etdiriləcəyini demişdir.
|
