Avroliqanın II təsnifat mərhələsinin ilk görüşləri keçirilib. Qitənin nüfuzuna görə Çempionlar Liqasından sonra ikinci ən səviyyəli turniri olan Avroliqada iki Azərbaycan klubu da növbəti mərhələyə adlamaq üçün mübarizə aparır. Yarışların bu mərhələsində ölkəmizi təmsil edən "Qarabağ" və "Xəzər Lənkəran" klubları ilk görüşlərini səfərdə keçiriblər.
Ağdamın "Qarabağ" klubu səfərdə Farer adalarının "Streymur" komandasının qonağı olub. İlkin təsnifat mərhələsində Litvanın "Banqa" klubunu darmadağın edən Qurban Qurbanovun komandası bu görüşün də favoriti sayılırdı. Buna görə də "Qarabağ"ın səfərdən sərfəli nəticə ilə dönəcəyi heç kəsdə şübhə doğurmurdu. "Qarabağ" artıq Rauf Əliyevin 11-ci dəqiqədə vurduğu qolla hesabda irəli çıxıb. Fəqət, "Qarabağ" son dəqiqələrdə qapısından qol buraxmaqla, bu üstünlüyü qoruyub saxlaya bilməyib. Rəqib oyuna əlavə edilmiş 2-ci dəqiqədə hesaba tarazlıq gətirib. Bununla belə, bu hesab "Qarabağ"ı tam qane edir.
UEFA Avropa Liqasına II təsnifat mərhələsindən qoşulan son ölkə kubokunun qalibi "Xəzər Lənkəran" isə səfərdə İsrailin "Makkabi" (Təl-Əviv) klubunun qonağı olub. Təl-Əvivə sərfəli nəticə dalınca gedən "Xəzər Lənkəran" ilk hissədə qapısında 3 qol görüb. Bununla belə, Mirça Rednikin komandası ilk hissənin sonlarında hesab arasındakı fərqi azaltmağa nail olub. Amma futbolçularımız hər halda bir səfər qoluna imza ata bilib ki, bu da Lənkərandakı oyun ərəfəsində növbəti mərhələyə çıxmaq şansımızı saxlayıb.
Hər komandamız cavab görüşlərini 5 gündən sonra, iyulun 21-də yerli tərəfdarları qarşısında keçirəcəklər.
Dünən Avropa Liqasında III mərhələnin püşkü atılıb. Püşkdə "Xəzər Lənkəran"ın bəxti gətirib. Lənkəran təmsilçisi Təl-Əviv "Makkabi"sini keçərsə, "Zelezniçar" (Bosniya və Herseqovina) - "Şerif" (Moldova) oyununun qalibi ilə görüşəcək. Bu, "Xəzər Lənkəran"ın 5 potensial rəqibi arasında ən münasibi idi.
Farer adalarının "Streymur" klubunu keçəcəyi şübhə doğurmayan "Qarabağ"a isə daha çətin rəqib düşüb. Bu, Belçikanın ən titullu klublarından olan, dəfələrlə ölkə çempionluğunu qazanan, Çempionlar Liqasının qrup mərhələsində çıxış etmiş "Brügge"dir. Qeyd edək ki, III mərhələnin oyunları iyulun 28-də və avqustun 4-də keçiriləcək. Komandalarımız ilk oyunlarını səfərdə keçirməlidirlər.
|
