Ötən həftə məxfi polis Güney Azərbaycanın Miyandab (əsl adı - Qoşaçay) şəhərində azərbaycanlı ziyalıları və gəncləri sorğu-suala tutub. Onları hədələyərək, "İsrailə, Amerikaya" və başqa xarici ölkələrə "casusluqda" ittiham edəcəklərini söyləyiblər.
Tanınmış ziyalı, türkoloq, arxeoloq, ingilis dili ustadı Əlaəddin Məlmasi də ötən həftə müəmmalı avtomobil qəzası nəticəsində həyatını itirib. Şahidlərin sözlərinə görə, mərhumun qəza nəticəsində ölməsinə dair inandırıcı sübut yoxdur. Ə.Məlmasinin ailəsi bildirib ki, o, şəxsi işləri bağlı İranın şimal səmtinə getmək adı ilə evdən çıxıb, ancaq avtomobil qəzası şərqdə - Şiraza yaxın bir yerdə baş verib.
GünAzTv-nin məlumatına görə, Əlaəddin Məlmasidən Azərbaycan türkcəsinə və qədim əsərlərə dair 120 cilddə çox qiymətli 120 kitab qalıb.
Əlaəddin Məlmasinin "ölüm qrupları" tərəfindən oğurlanıb öldürüldüyü şübhə doğurmur. Çünki Azərbaycan türklərinin milli haqları uğrunda mübarizə aparanlara qarşı həbs, çeşidli təzyiq üsulları ilə yanaşı, belə insanları oğurlayıb müəmmalı şəkildə öldürmək də var. Ötənlərdə bu kimi hallar az olmayıb.
3 il öncə Qulamrza Əmani Əhər-Təbriz yolunda, Təbrizin girişində İran İslam İnqilab Keşikçiləri Qvardiyasına məxsus yük maşını vasitəsi ilə "avtomobil qəzasına" düşmüşdü. "Qəza" zamanı onunla birlikdə iki qardaşı da həlak olmuşdu.
Mühəndis Qulamrza Əmani mühəndis-aqronom idi. Milli haqlar uğrunda fəaliyyətinə görə dəfələrlə həbs edilmiş, fiziki-mənəvi işgəncələrə məruz qalmışdı. Lakin bu "cəzalar" onu tutduğu yoldan döndərə bilməmişdi. Həbsxanadan çıxandan sonra məxfi polis tərəfindən ölümlə hədələnmişdi. Onu sındıra bilməyənlər "avtomobil qəzası" ilə həyatına son qoydular.
Fərhad Möhsüninin cəsədi Təbrizin "Şahgölü" adlı parkından tapılmışdı. Güllə yaralarından ölmüşdü. Ailəsi onu xeyli vaxt idi axtarırmış. 25 yaşlı Fərhad Möhsüni 2006-cı ilin məlum may etiraz aksiyalarının ildönümü ərəfəsində məxfi polis tərəfindən oğurlanmışdı. O, 2006-cı il mayın 22-də isə Təbrizdə etiraz aksiyası zamanı polislərin açdığı atəşdən güllə yarası almış və tutulmuşdu. Vəkilin iştirakı olmadan qapalı məhkəmədə mühakimə olunmuşdu. Hakimiyyət adamları gəncin valideynlərini hədələyərək demişdilər: "Onun həbsdə olması barədə məlumat yaymayın. Əks halda, onunla yanaşı siz də cəzalanacaqsınız".
İranın rəsmi xəbər agentliyi İRNA Şərqi Azərbaycanın polis rəisinin bu gəncin qətli ilə bağlı açıqlamasını yaymışdı:
"20 gün öncə 23 yaşlı Fərhad Möhsüni dostları ilə gəzməyə çıxıb. Bundan sonra izsiz yoxa çıxıb. Cəsəd Elgölündə (Şahgölü) tapılıb, məhkəmə tibbi-ekspertiza onun bədənində döyülmə və zədə halları müşahidə edib. Onun psixotrop maddə qəbul etdiyi aşkarlanıb. Son nəticəyə görə, Fərhad Möhsüni qəbul etdiyi həblərin nəticəsində özünü suda boğub..." (?!).
2006-cı ilin may etiraz aksiyalarında həbs olunmuş Səttar Səliminin saxlanıldığı yeri də polis gizli saxlayırdı. O, həbsdə olduğu iki ay ərzində ağır işgəncələrə məruz qalmış, sonra qətlə yetirilmişdi. Onda hakimiyyət təmsilçiləri S.Səliminin cənazəsini ata-anasına təhvil verəndə ölümün səbəbi barədə təxminən oxşar fikir söyləmişdilər:
"Səttar Səlimi zindandan qaçıb, Arazdan keçərkən boğulub" (?!). Amma ölkənin çağdaş tarixində İran həbsxanasından kiminsə qaçmasına dair fakt bəlli deyil.
Azərbaycanın məşhur uşaq yazıçısı Səməd Behrəngi də şahın zamanında Arazda "boğulmuşdu". Bu baxımdan şah və ya ayətullalığından asılı olmayaraq, Tehran hakimiyyəti düşmənlərini eyni üsulla aradan çıxarır, "suda boğma" üsulu da eynilə qalır.
|
