Mövsümi meyvələr bahadır. Əhalinin alıcılıq qabiliyyəti isə aşağıdır. Mövsümi meyvələrin qiymətləri əhalinin gəlirləri ilə üst-üstə düşmür. Bazarlarda yüksək qiymətlər müşahidə olunur. Əhalinin orta aylıq əməkhaqqı 350 manatdır. Orta statistik rəqəmlərə görə, bu qiymətlərlə Azərbaycan ailəsini bütün dövrlərdə müvafiq meyvə-tərəvəzlə təmin etmək ailə üçün çətinlik doğurur.

KTN-də hesab edirlər ki, əksinə, indi qiymətlər may ilə müqayisədə 50 faiz ucuzlaşıb. Nazirliyin mətbuat katibi Murtuzəli Hacıyev deyir ki, təxminən 10 gün sonra gilas və digər çəyirdəkli meyvələrin qiymətində 50-80 qəpik ucuzlaşma gözlənir. Yerli meyvə bazara yenicə çıxmağa başlayıb:

"Hələ bu kütləvi deyil. Qiymətlər ona görə yüksəkdir. Yəni məhsulların kütləvi yetişmə dövrü var. Bir həftə - 10 gün sonra çoxalma və ucuzlaşma müşahidə olunacaq".

Fermerlər İttifaqının sədri Sadıq Murtuzayevin fikrincə, bahalaşmanın da qarşısının alınması zəruridir. Onun dediyinə görə, əksər hallarda yerli meyvə-tərəvəz becərildiyi rayon və kənddə ucuz olur. Lakin paytaxta gətiriləndə süni bahalaşdırılır. O bunu yolverilməz sayır və hesab edir ki, inhisarçılıqla mübarizə aparılmalıdır.

İqtisadçılar hesab edirlər ki, qiymət artımına təkan verən amil olaraq bazarların inhisarlaşması, bazara girişin məhdudlaşmasını görürlər. Bundan başqa, idxalda da inhisarçılıq müşahidə edilir. Bildirilir ki, bazarlara fermerlərin girişini asanlaşdırmaq və məhsul bolluğunu yaratmaq üçün əhalinin kənd təsərrüfatına dönüşünü stimullaşdırmaq vacibdir.