Təsisçiləri yalnız qadınlardan ibarət olan "Qadın Dünyası" Kredit İttifaqı təsis edilib. Hesab edilir ki, bu kredit ittifaqını yaratmaqla qadınların kiçik bizneslə məşğul olmasına geniş imkanlar açılacaq. Belə ki, ittifaq ucqar rayonlarda qadın salonlarının açılmasına, xalçaçılıq, toxuculuq, süd məhsulları, quru meyvələrin istehsalı və digər sahələrin inkişafı üçün ilkin materialların alınmasına kredit verəcək.
Ölkədə mövcud kredit ittifaqlarının üzvlərinin 60 faizi kişilərdən, 40 faizi isə qadınlardan ibarətdir. "Qadın Dünyası" Kredit İttifaqının yaradılmasına "Qadın Dünyası" İctimai Birliyi və Azərbaycan Kredit İttifaqları Assosiasiyası İB kömək göstərir.
Yeri gəlmişkən, dünyanın bir çox ölkələrində təsisçiləri qadınlardan ibarət kredit ittifaqları, hətta onların assosiasiyaları fəaliyyət göstərirlər. Bunlardan Kanadanın "Ottava Qadınlarının Kredit İttifaqı", ABŞ-da "Qadınların Cənub-Qərb Federal Kredit İttifaqı", Qanada "Qadınların Kredit İttifaqı" və digər kredit ittifaqlarının, hətta "Qadınların Kredit İttifaqları Rəhbərlərinin Assosiasiyası"nın adlarını qeyd etmək olar.
|
