Qırx ildən sonra Yer əhalisinin sayı 6,9 milyarddan 9,2 milyarda çatacaq. Odur ki, BMT dünya fermerlərinin diqqətini ərzaq istehsalını ikiqat artırmağın vacibliyinə yönəldir. BMT-nin dünya iqtisadi və sosial sorğusuna görə, 9 milyard insanı ərzaqla təmin etmək üçün qlobal ərzaq istehsalı 2050-ci ilə qədər 70-lə 100 faiz arasında artmalıdır.
Amma məsələ ondadır ki, artım prosesində kənd təsərrüfatının inkişaf sürəti zəifləyəcək. Hesablamalarına görə, 2020-ci ilədək artım sürəti 1,7% təşkil edəcək. Halbuki əvvəlki onillikdə bu rəqəm 2,6% olub. Bunun səbəbi təbii resursların tükənməsi, iqlim dəyişikliyi və kənd təsərrüfatı məhsullarından bioyanacaq üçün xammal kimi istifadə olunmasıdır. BMT isə xəbərdarlıq edir ki, ərzaq istehsalında bu cür sürətli artım yalnız ölkələr ətraf mühitə az zərər vura biləcək üsullardan istifadə etməyə səy göstərsələr, baş tuta bilər. Mühüm dəyişikliklər edilmədiyi təqdirdə iqlim dəyişikliyi və havanın çirklənməsi ərzaq istehsalına təsir göstərə bilər.
BMT Ərzaq və Kənd Təsərrüfatı Təşkilatı qiymətlərin bahalaşacağını da istisna etmir və bildirir ki, qarşıdakı 10 il ərzində taxılın qiyməti orta hesabla 20%, ətin qiyməti isə 30% arta bilər. Ərzağın bahalaşması planet əhalisinin sayının sürətli artımı fonunda baş verəcək. Məhsul istehsalının artım sürətinin azalması, demək olar, bütün bitkilərdə hiss olunacaq, amma bu azalma ən çox yem bitkilərdə baş verəcək. Bu isə öz növbəsində dünyada taxılın qiymətinə təsir etməyə başlayacaq.
Ekspertlər artıq bu prosesin başladığını bildirirlər. Belə ki, son 12 ayda Çikaqo birjasında qarğıdalının qiyməti 73, taxılın 48, düyünün isə 27 faiz bahalaşıb.
|
