UEFA Avropa Liqasının birinci təsnifat mərhələsinin cavab oyunları keçirilib. Bu mərhələdə mübarizə aparan "Qarabağ" və AZAL növbəti oyunlarına çıxıblar.
Ağdam klubunun "Banqa" (Litva) komandasına qarşı səfərdə keçirdiyi ilk matç təmsilçimizin qələbəsiylə (4:0) başa çatmışdı. "Qarabağ" böyükhesablı qələbə sayəsində növbəti mərhələyə vəsiqəni təmin etdiyindən formal xarakter daşıyan cavab oyunu sadəcə Azərbaycanın UEFA reytinqindəki xalını artırmaq baxımından əhəmiyyət daşıyırdı. Bununla belə Qurban Qurbanovun komandası Bakı görüşündə də tam üstünlüklə qalib gələrək (3:0) növbəti mərhələyə adladı. Qolları Admir Teli (29-cu dəq.), Rəşad Sadiqov (35) və Ansi Aqolli (77) vurdular. Qurban Qurbanov görüşdən sonra demişdir: "Biz bu oyuna ciddi hazırlaşmışdıq. Futbolçuların psixologiyasını dəyişmək lazımdı. Artıq onlar qalib ruhuna malik olmalıdır. Növbəti rəqibimizə gəlincə, "Streymur" haqqında informasiyamız var. Farer adalarının klubuna yuxarıdan aşağı baxmaq lazım deyil, oynamaq lazımdır. "Streymur" 4 ildir ki, Avropanın klub turnirlərində oyun təcrübəsinə malikdir. Çalışacağıq ki, qələbələri sıralayaq. Çünki bizim qələbələrə daha çox ehtiyacımız var. Yalnız bu halda komandamızda qələbə psixologiyası formalaşa bilər".
"Qarabağ"ın növbəti rəqibi isə Farer adalarının "Streymur" klubudur. Bu komandalar arasında keçiriləcək oyunların başlama saatları və keçirilmə yerləri artıq bəllidir. Ağdam klubunun rəqiblə ilk dueli səfərdə olacaq. Görüş iyulun 14-də Torshavndakı "Qundadalur" stadionunda keçiriləcək. Matç yerli vaxtla 19:00-da (Bakı vaxtı ilə saat 23:00-da) başlanacaq. "Streymur" - "Qarabağ" oyununu Uelsdən olan referi Mark Stiven Uitbi idarə edəcək. Cavab görüşü isə iyulun 21-də Bakıda, Tofiq Bəhramov adına Respublika stadionunda olacaq. Həmin qarşılaşma isə saat 21:00-da başlayacaq.
Avropa Liqasında ölkəmizin digər təmsilçisi AZAL "Qarabağ"dan fərqli olaraq ümidləri doğrultmayıb. Bakıda Belarus təmsilçisi "Minsk"lə heç-heçə oynayan (1:1) AZAL Minskdə keçirilən cavab oyununda uduzub - 1:2. Bu uğursuzluqdan sonra AZAL-ın baş məşqçisi Nazim Süleymanov istefa verib. Klubun prezidenti Vaqif Qasımov isə Nazim Süleymanovun istefasını qəbul edib və onun boşalan postuna yerli mütəxəssis gətirəcəklərini deyib:
"Bəli, biz artıq Nazimin istefasını qəbul etdik. O, hələ oyundan öncə də mənə demişdi ki, uduzsaq, komandadan gedəcək. Fikrimcə, məğlubiyyətimizdə elə o günahkardır. Onun yerinə kimi gətirəcəyimizi hələ bilmirəm. Sadəcə onu deyə bilərəm ki, yerli mütəxəssis gətirəcəyik. Əcnəbi mütəxəssis bizə lazım deyil".
|
