Voleybol üzrə Avropanın ən nüfuzlu klub yarışı Çempionlar Liqasında bu mövsüm ölkəmizi qadınlardan ibarət iki komanda - Azərbaycan çempionu "Rabitə" və gümüş medalların sahibi "Azərreyl" təmsil edəcək. Komandalarımızın rəqibləri də məlumdur.
Bu, voleybol üzrə Çempionlar Liqasının Avstriyanın paytaxtı Vyanada keçirilən püşkatma mərasimindən sonra mümkün olub. "Rabitə" "Fənərbaxça Acibadem" (Türkiyə), ASPPT (Fransa) və "Drezdner" (Almaniya) ilə mübarizə aparacaq. "Azərreyl" isə "Volley" (İtaliya), "Vakıfbank" (Türkiyə), "Tomis-2004" (Rumıniya) ilə qarşılaşacaq. Püşkatmanın nəticəsinə görə, komandalar qruplar üzrə bu qaydada bölüşüblər:
"A" qrupu: "Kann" (Kann, Fransa), "MC Carnaghi "(Villa-Kortese, İtaliya), "Şveriner" (Şverin, Almaniya), "Eczaçıbaşı" (İstanbul,Türkiyə). "B" qrupu: "Rabitə" (Bakı, Azərbaycan), ASPPT (Mulhouse, Fransa), "Fənərbaxça" (İstanbul, Türkiyə), "Dresdner" (Drezden, Almaniya). "C" qrupu: "Dinamo" (Kazan, Rusiya), "Sopot" (Sopot, Polşa), "Volero" (Sürix, İsveçrə), "Modranska" (Prosteyov, Çexiya). "D" qrupu: "Azərreyl" (Bakı, Azərbaycan), "Volley" (Berqamo, İtaliya), "Vakıfbank" (İstanbul, Türkiyə), "Tomis-2004" (Konstanza, Rumıniya). "E" qrupu: "Skavolini" (Pesaro, İtaliya), "Bank BPS Fakro" (Muşina, Polşa), "Dinamo" (Moskva, Rusiya), "Srvena Zvezda" (Belqrad, Serbiya).
Qeyd edək ki, voleybol üzrə Çempionlar Liqasının 2011/12 mövsümü yeni formatla keçiriləcək. Belə ki, dörd komandadan ibarət olan 5 qrupdan ilk 3 yeri tutmuş komandalar pley-offa vəsiqə qazanacaq. Bundan əlavə, ən yaxşı göstəriciyə malik bir dördüncü komanda da növbəti mərhələyə adlayacaq. Beləliklə, pley-offda 16 komandanın iştirakı mümkün olacaq.
Vyanada eyni zamanda 2011/2012-ci ildə qadın voleybolçular arasında Çempionlar Liqasında həlledici mərhələ sayılan "Dördlər finalı"nın məkanına da aydınlıq gəlib. Avropa Voleybol Konfederasiyası final oyunlarının Azərbaycanda keçirilməsi barədə qərar çıxarıb.
Sonda xatırladaq ki, qadınlardan ibarət komandalarımızdan fərqli olaraq kişi voleybolçularımız yeni mövsümdə Avropanın klub turnirlərində iştirak etməyəcəklər.
|
