Dünya Azərbaycanlıları Konqresi (DAK) bu bazar ertəsi Atatürk Mərkəzində Güney Azərbaycan problemilə bağlı "dəyirmi masa" keçirib. DAK Azərbaycan nümayəndəliyinin rəhbəri Səftər Rəhimli bugünkü müzakirələrin əsas mövzusunun İranda yaşayan Azərbaycan türklərinin ən elementar hüquqlardan belə məhrum edilməsi məsələsi olduğunu deyib ("Turan").
Türkiyə Azərbaycanlıları Birliyinin rəhbəri, keçmiş millət vəkili Abbas Bozyel Güney Azərbaycan probleminə etnik problem kimi baxdığını bildirib. Bozyel son vaxtlar ərəb dünyasında baş verən inqilabi proseslərin kökündə də müəyyən mənada etnik və məzhəb proseslərinin olduğunu qeyd edib.
Bozyel Serbiya, İraq və s. yerlərdə türk etnosunun soyqırımlara məruz qalması məsələsinə toxunub. Onun sözlərinə görə, türklər həmişə strateji əhəmiyyətli coğrafi arealda məskunlaşıblar, ona görə bu ərazilərdə daim dünya dövlətlərinin siyasi maraqları toqquşub.
Toplantıda İran azərbaycanlıları İranda "siyasi mühiti yaradan millət" kimi səciyyələndirilib. Lakin müzakirələr zamanı İrandakı, özəlliklə Güney Azərbaycandakı durum və etnik azərbaycanlıların hüquqları və problemləri ciddi təhlil olunmayıb. Toplantıda problemin həll yolları barədə də hər hansı maraqlı fikir səslənməyib.
|
