Bakı Ağır Cinayətlərə Dair İşlər üzrə Məhkəmədə "Əl-Qaidə" terror təşkilatı ilə əməkdaşlıqda ittiham olunan Rəhim Salmanovun cinayət işi üzrə növbəti məhkəmə prosesi keçirilib (APA). Prosesdə dövlət ittihamçısı çıxış edib. Prokuror çıxışında təqsirləndirilən Rəhim Salmanovun məhkəmə istintaqı zamanı cinayətinin sübuta yetirildiyi qənaətinə gəlindiyini qeyd edərək, məhkəmədən onun 15 il müddətinə azadlıqdan məhrumetmə cəzası çıxarılmasını istəyib. Qusar rayon sakini Rəhim Salmanov 4 il axtarışda olub, 2006-cı ildə Rusiyada həbs edilərək Azərbaycana ekstradisiya edilib. Salmanov Azərbaycan, Rusiya, Türkiyə və Yəmən vətəndaşlarından ibarət 15 nəfərlik dəstənin üzvlərindən olub və "İslam irsinin dirçəlişi" cəmiyyətinin, o cümlədən "əl-Qaidə" təşkilatının tərkibində Gürcüstanın Pankisi dərəsindəki düşərgələrdə təlim keçib. O, CM 126.3-cü (qəsdən sağlamlığa ağır xəsarət yetirmə, ehtiyatsızlıqdan zərərçəkmiş şəxsin ölümünə səbəb olma), 29, 278-ci (hakimiyyəti zorla ələ keçirmə və ya onu zorla saxlamağa cəhd), 279-cu (qanunvericilikdə nəzərdə tutulmayan silahlı birləşmələri və ya qrupları yaratma), 283-cü (milli, irqi, sosial və ya dini nifrət və düşmənçiliyin salınması) maddələri ilə ittiham olunub. Bu dəstənin digər üzvləri - Arif Hacıyev ömürlük, Emil Hacıverdiyev 10 il, Hamdan Mohammed Ahmed Salem, Hacı Çankayev, Abdulla Abdulkərimov və Şirin Əliyev 7 il, Aslan Berkov, İsa İslamov, Karanay Abdulhəmidov, Arsen Qaziyev, Jembek Əsədullayev, Mustafa Dəlibaşlar, İnan Əhməd, Hayal Səlçuq Hüsnü, Həsən Ağayev və Karakaş Cuma Şıximam 5 il müddətinə azadlıqdan məhrum ediliblər. Rəhim Salmanov isə 2008-ci ildə 15 il müddətinə azadlıqdan məhrum edilib. Lakin yuxarı məhkəmə instansiyaları bu hökmü ləğv edib və cinayət işi yenidən məhkəməyə göndərilib.
|
