Ermənistan ziyalılarının nümayəndələri ölkənin baş naziri Tiqran Sarkisyana və parlamentin spikeri Ovik Abramyana məktub göndərərək, "ölkədən miqrasiyanın fəlakət həddinə çatması" ilə əlaqədar tədbirlər görməyə çağırıblar, deyə "Turan" agentliyi Armİnfoya istinadən xəbər verir.
Sənədi iqtisad elmləri doktoru Tatul Manaseryan, Ermənistan Yazıçılar Birliyinin sədri Levon Ananyan, Rəssamlar İttifaqının sədri Karen Aqamyan, Bəstəkarlar İttifaqının rəhbəri Robert Amirxanyan və digərləri imzalayıblar.
Məktub müəllifləri hakimiyyəti kortəbii miqrasiya ilə yanaşı, bir sıra ölkələrdə həyata keçirilən ermənilərin immiqrasiyası proqramının da vəziyyətə təsir etdiyinə diqqət yetirməyə çağırırlar.
Rəsmi proqnozlara zidd olaraq, ölkə əhalisi xeyli azalıb; Ermənistan bölgələrinin əmək qabiliyyətli əhalisinin təxminən 40%-i xaricdədir; sovet illərində başlamış sərhəd kəndlərin boşalma prosesi getdikcə güclənir.
Sənəd müəlliflərinin fikrincə, miqrasiyanın əsas səbəbləri təkcə yoxsulluq deyil, həm də ölkəni idarəetmə sistemindəki problemlər, gündən-günə pisləşən mənəvi-psixoloji mühit, cəmiyyətin qütbləşməsi, sadə vətəndaşların məhkəmə, vergi, polis özbaşınalığı qarşısında özlərini müdafiəsiz hiss etməsi, biznes yolundakı maneələr, qanunun fərdi tətbiqi və s.-dir.
Tatul Manaseryanın mətbuat konfransında bildirdiyinə görə, bu məktub ölkə rəhbərliyinin nəhayət ölkənin demoqrafik, iqtisadi və milli təhlükəsizliyi üçün təhlükəli olan problemlərin həllinə diqqət yetirməsinə yönəlmiş həyəcan siqnalıdır.
Milli Statistika Xidmətinin məlumatına görə, 2010-cu ildə 12 min nəfər Ermənistanı tərk edib. Ekspertlərin fikrincə, bu rəqəm hədsiz dərəcədə kiçildilib, əslində 70 minə yaxın insan ölkəni tərk edib. Bu zaman ölkənin ümumi əhalisi 2,5 milyon nəfər təşkil edir. Bəzi başqa rəqəmlərə görə, əslində ölkə əhalisi 1,7-2,0 milyon civarındadır.
|
