Futbol üzrə Azərbaycan çempionatının birinci dəstəsinin qalibi, Premyer Liqaya vaxtından əvvəl vəsiqə qazanan "Abşeron" nə qədər gözlənilməz olsa da, artıq mövcud deyil. Bir ay əvvəl güclülər dəstəsinə çıxmasını bayram edən və növbəti mövsümlə bağlı planlar quran komanda artıq yoxdur. Ötən il birincilikdə məğlubiyyət acısı yaşamayan "Abşeron"un Azərbaycan Premyer Liqasında debüt edəcəyi bir vaxtda komanda maddi imkansızlıq ucbatından dağıldı.
"Abşeron" klubunun rəhbərliyi maliyyə problemləri ilə əlaqədar olaraq klubun çempionatda iştirakından imtina edib. "Abşeron"dan fərqli olaraq, Premyer Liqaya ikinci vəsiqənin sahibi "Rəvan" güclülər dəstəsində mübarizə aparacaq.
"Abşeron"un Premyer Liqada oynamaqdan rəsmən imtina etməsindən sonra onu əvəz edəcək komandanın adına da aydınlıq gəlib. Bu, "Sumqayıt Şəhər" Peşəkar Futbol Klubudur. Beləliklə, Sumqayıt şəhəri yenidən Azərbaycan milli çempionatında təmsil olunacaq. "Sumqayıt Şəhər" Peşəkar Futbol Klubu Premyer Liqamızda növbəti mövsümdən iştirak edəcək. Bununla bağlı klub rəhbərliyi Peşəkar Futbol Liqasına (PFL) müraciət edib. Klubun maliyyə sabitliyi və güclülər dəstəsində iştirak etməsi ilə bağlı müraciətini nəzərə alan PFL rəhbərliyi buna müsbət cavab verib. Bundan sonra "Sumqayıt Şəhər" klubu bütün hüquqi sənədləri həll edərək yeni mövsümdən yüksək liqada iştirak edəcəyini yəqinləşdirib. Bundan başqa, klub maliyyə məsələlərini həll etmək üçün "Azərkimya" İstehsalat Birliyi ilə sponsorluq haqqında müqavilə imzalayıb. Klub rəhbərliyi inanır ki, komanda baxımlı oyunu ilə bol-bol sevinc bəxş edəcək və Sumqayıtda futbol ənənəsini daha yüksək şəkildə davam etdirəcək. Klubun prezidenti Kamran Quliyev təyin olunub.
Qeyd edək ki, Sumqayıt indiyə kimi milli çempionatımızda bir neçə adla komanda ilə təmsil olunub. Sonuncusunun adı "Sumqayıt" olub ki, həmin komanda I divizionda ötən çempionatı 7-ci yerdə bitirib.
|
