Şair təkadamlıq kamerada saxlanır İranda türk dilində yazan tanınmış şair-publisist, jurnalist Səid Muğanlı həbsxanada təkadamlıq kamerada saxlanılır. APA-nın İrandakı mənbələrə istinadən verdiyi məlumata görə, Təbriz şəhər Prokurorluğundan Səid Muğanlının yaxınlarına bildirilib ki, onunla hər hansı təmasa icazə verilmir və o, istintaq təcridxanasının təkadamlıq kamerasında saxlanılır. Yaxın 1 ay ərzində təcridxananın ümumi bölməsinə köçürülməsi nəzərdə tutulur. Prokurorluq Səid Muğanlıya qarşı irəli sürülən ittihamın təfsilatları barədə məlumat verməkdən isə imtina edib. Ancaq bildirilib ki, ittiham aktı yalnız vəkil tutulduqdan sonra müdafiəni təşkil edəcək şəxsin iştirakı ilə Səid Muğanlıya elan ediləcək. Məlumatda o da qeyd olunub ki, jurnalistə vəkil tutmasına icazə verilib və yaxın bir neçə gün ərzində Səid Muğanlının müdafiəsini təşkil edən vəkilin kimliyi bəlli olacaq. Bir müddət öncə Səid Muğanlı İran İslam Respublikasının dövlət quruluşunu, rəhbər şəxslərini tənqidi xarakterli şeir yazıb və müəllif bu şeiri internet resursları vasitəsilə yayıb. İyunun 5-də isə valideynlərinin yaşadığı Ərdəbil vilayətinin Muğan bölgəsinin Yelsu kəndindəki evlərində saxlanılıb. Evdə axtarış aparılıb və ona məxsus kompüter, kitablar və digər şəxsi əşyalar götürülüb. Bu səbəbdən də İran İnformasiya və Təhlükəsizlik Nazirliyinin əməkdaşları onu saxlayan zaman ədəbi fəaliyyəti ilə maraqlanıblar və əlyazmaları müsadirə olunub. Səid Muğanlı Təbriz şəhərində təcridxanada saxlanılır. Artıq İranda yaşayan Azərbaycan türkləri arasında Səid Muğanlının sərbəst buraxılması tələbi ilə bağlı imzatoplama kampaniyasına da başlanılıb. Səid Muğanlı Azərbaycan türkcəsində yazılan ədəbiyyat nümunələrini əski əlifbaya çevirərək İrandakı türklərin maariflənməsi işində fəal iştirak edən şəxslərdən biridir. O, 2007-2008-ci illərdə Bakıda ədəbi məclislərin iştirakçısı olub. Bakıdan qayıtdıqdan sonra İranın dövlət quruluşuna xələl gətirə biləcək fəaliyyətdə ittiham olunaraq İran İnformasiya və Təhlükəsizlik Nazirliyi tərəfindən tutulub. Bir müddət sonra isə girov müqabilində sərbəst buraxılıb.
|
