Avroliqanın püşkatma mərasimindən sonra ölkəmizi bu turnirdə təmsil edən "Qarabağ", AZAL və "Xəzər-Lənkəran" klublarının rəqibləri bəlli olub. "Qarabağ" və AZAL turnirə ilk mərhələdən, "Xəzər-Lənkəran" isə ikinci mərhələdən qoşulacaq. I təsnifat mərhələsinin oyunları iyunun 30-da və iyulun 7-də, II mərhələnin görüşləri isə iyulun 14-də və 21-də keçiriləcək.
Bu mövsüm Azərbaycan çempionatının gümüş medallarını və kuboku qazanmış "Xəzər-Lənkəran"ın bəxtinə güclü rəqib düşüb. Bu, İsrailin ən yaşlı klubu olan, Çempionlar Liqasında qrup mərhələsində oynamış Təl-Əviv "Makkabi"sidir.
"Xəzər-Lənkəran" ilk oyununu səfərdə keçirəcək. Öncə ilk oyunun Azərbaycanda olacağı bildirilsə də, sonradan "Makkabi"nin müraciətinə və "Xəzər-Lənkəran"ın razılığına əsasən UEFA qarşılaşmanın iyulun 14-də İsraildə təşkilinə qərar verib. Qeyd edək ki, cavab oyunu iyulun 21-də Lənkəran şəhər mərkəzi stadionunda baş tutacaq.
Ötən mövsümdə Avroliqanın son təsnifat mərhələsinə kimi irəliləyərək, reytinqini xeyli artıran "Qarabağ" bunun bəhrəsini görüb. Belə ki, ilk iki mərhələdə münasib rəqiblərlə düşən Ağdam klubunun həm Litvanın "Banqa", həm də Farer adalarının "Streymur" komandasını keçmək şansı yüksəkdir. Üstəlik, Qurban Qurbanovun komandası hər iki halda ilk görüşlərini səfərdə keçirməklə üstünlük qazanıb.
"Qarabağ"ın Litva təmsilçisiylə oyununun vaxtı dəqiqləşib. Ağdam klubu iyunun 30-da ilk oyuna çıxacaq. "Banqa" - "Qarabağ" oyunu yerli vaxtla 18:30-da (Bakı vaxtı ilə 20:30) təşkil olunacaq. Görüşü Torvaldur Arnasonun başçılıq etdiyi islandiyalı hakimlər briqadası idarə edəcək. AZAL-ın da, belə demək mümkünsə, bəxti gətirib. Hər halda, "Minsk" (Belarus) potensial rəqiblər arasında ən münasibidir. AZAL - "Minsk" arasında ilk oyun iyunun 30-da Şüvəlan qəsəbəsindəki "AZAL" stadionunda keçiriləcək. Matç saat 20:00-da başlayır. Oyunun baş hakimi litvalı Andris Treimanisdir.
Nazim Süleymanovun komandası II mərhələyə çıxarsa, daha güclü rəqib - Türkiyə Superliqasının təmsilçisi "Qaziantepspor"u qəbul edəcək.
|
