Azərbaycanlı musiqi müəllimi, bəstəkar Həsən Dəmirçinin Şərqi Azərbaycan Vilayət Polis İdarəsinə qarşı şikayəti rədd edilib. Dünya Azərbaycanlıları Konqresindən (DAK) APA-ya bildirilib ki, Təbrizdə yaşayan Həsən Dəmirçi 2006-cı ilin may hadisələrində tutulub və 1 il həbs cəzasına məhkum edilib. Lakin İran Ali Məhkəməsi birinci və ikinci məhkəmə instansiyalarının qərarını ləğv edib və musiqiçinin sərbəst buraxılmasına dair qərar çıxarıb. Həsən Dəmirçi sərbəst buraxılsa da, onun musiqi məktəbi bağlanıb. Musiqiçinin polis idarəsinə qarşı yerli məhkəmə instansiyasında irəli sürdüyü şikayətdən 4 il keçəndən sonra iddiaçının şikayəti rədd edilir. Məhkəmə iddianın rədd edilməsini Həsən Dəmirçinin millətçi olması ilə (?) əlaqələndirib. Amerikalıların məhkəməsi iyulun 31-nə təyin olunub İranda casusluqda şübhəli bilinib saxlanılmış iki amerikalı səyyahın məhkəmə dinləməsi iyulun 31-nə təyin olunub. Onların vəkili Məsud Şəfili "Amerikanın səsi" radiosuna deyib ki, məhkəmə prosesinin vaxtı barədə rəsmi bildirişi iyunun 20-də alıb. Dinləmə amerikalıların saxlanmasının ikinci ildönümünə təsadüf edir. 2009-cu ildə İran hökuməti amerikalı Sara Şourd, Coş Fatal və Şeyn Brauri İrana qanunsuz keçdiklərinə görə həbs edib. İttihama görə, onlar İrana İraq ərazisindən keçiblər. Tutulanlardan biri - Şourd keçən il zaminə buraxılıb, qalan ikisi hələ də həbsdədir. Şourd azadlığa çıxandan sonra deyib ki, həbsxana gözətçiləri içəridə qalan iki amerikalını təhqir edir, onlara işgəncə verir. Keçən həftə İranın baş prokuroru deyib ki, amerikalıların məhkəməsi yay ərzində - iyunun sonundan avqustun sonuna qədər olan müddətdə yenidən başlayacaq. Amerikalılara ailələri ilə əlaqə saxlamağa iki ildə üç dəfə icazə verilib. Məhbusların hər ikisinin anası deyir ki, onlar oğulları ilə beş dəqiqə danışa biliblər, hər ikisinin səsi telefonda gümrah gəlirmiş.
|
