Pasiyentlərin tibbi xidmətlərlə bağlı iradları, şikayətləri azalmır. Həkimlərin, tibb müəssisələrinin məhkəməyə verilməsi faktları da az deyil. Odur ki, yeni hüquqi mexanizmlərin tətbiqinə zərurət var. Pasiyentlərin hüquqlarını qoruyan, onları müdafiə edən qanun mövcud deyil. Ona görə müalicə zamanı və cərrahiyyə əməliyyatından sonra mənfi fəsadlarla üzləşən xəstə həkimin cəzalandırılması və ya kompensasiya tələbində çətinlik çəkir.
Öyrəndik ki, MM səhiyyə sistemi ilə bağlı bir sıra dəyişikliklər nəzərdə tutan qanun layihələrini müzakirəyə çıxaracaq. Onların sırasında daha çox diqqəti cəlb edəni "Pasiyentlərin hüquqları haqqında" layihədir. Layihədə həkim-xəstə münasibətlərinin hüquqi tərəfləri ilə yanaşı, həkimlərin səhvlərinə görə inzibati və məhkəmə məsuliyyətinə cəlb edilməsi də əksini tapır.
MM Sosial Siyasət Komitəsinin sədri Hadı Rəcəblinin sözlərinə görə, qanun layihəsində pasiyentlərin informasiya əldəetmə hüququ da nəzərdə tutulur, xəstələrin razılığı olmadan hansısa müalicə üsullarından istifadə qadağan edilir. Eyni zamanda xəstənin müalicə aldığı tibb müəssisəsində göstərilən xidmətlər və dərman vasitələrinin təmin olunması ilə bağlı tələblərinin gücləndirilməsi nəzərə alınır. Xəstə səhv müalicə aldığı halda həkimin cəzalandırılmasını, yaxud ondan kompensasiya tələb edə biləcək. Rəcəblinin fikrincə, belə bir qanuna ehtiyac var. Çünki cəmiyyətdə ciddi müzakirə edilən məsələlərdən biri məhz səhiyyə xidmətləri ilə bağlıdır.
|
