"Sahilyanı ölkələrin problemə ümumi yanaşması Xəzərin hüquqi statusunun yaxın perspektivdə öz həllini tapacağına ümid yaradır".

Bu bəyanatla Qazaxıstan xarici işlər nazirinin müavini Kayrat Sarıbay Astanada "Xəzər şelfinin inkişafı" konfransında çıxışı zamanı deyib. Sarıbay bildirib ki, tərəflərin ortaq məxrəcə gəlmək əzmi və son zamanlar artan dövlətlərarası təmaslar status məsələsinin çözüləcəyini düşünməyə əsas verir:

"Nikbinliklə demək olar, Xəzəryanı ölkələrin yanaşması, nümayiş etdirilən konstruktivizm, ümumi dil tapmaq istəyi və regionda artan inteqrasiya prosesləri bunun üçün münbit zəmin yaradır".

Nazir müavini onu da qeyd edib ki, "Xəzərin hüquqi statusuna dair konvensiya Xəzərətrafı ölkələr arasında əməkdaşlığı tənzimləyən baza sazişi olmalıdır".

Xatırladaq ki, Xəzərin statusuna dair dövlət başçılarının növbəti zirvə görüşü cari ilin sonu Moskvada keçirilməlidir. İşçi qruplarının son Bakı görüşündə Rusiya rəsmiləri Moskva sammitində mühüm sazişlərin imzalanacağına ümid etdiklərini bildiriblər.