Azərbaycan gəmilərinin Rusiyanın Volqa-Don kanalından keçidi ilə bağlı icazə sistemi sadələşdirilə və ya tamamilə ləğv edilə bilər. Bu barədə X Beynəlxalq Nəqliyyat, Tranzit və Logistika ("TransCaspian Azerbaijan - 2011") sərgisində çıxışında Rusiyanın nəqliyyat naziri İqor Levitin bildirib. Jurnalistlərə açıqlamasında isə İqor Levitin qeyd edib ki, Azərbaycan tərəfi gəmilərin bu kanaldan buraxılmasının ləngiməsindən narazıdır:
"Biz bilirik ki, azərbaycanlı həmkarlarımız heç də həmişə bununla bağlı operativlikdən razı qalmırlar".
Nazirin sözlərinə görə, hazırda Rusiya bu kanalın modernləşdirilməsi üzərində işləyir:
"Rusiya Volqa-Don kanalının təkmilləşdirilməsi ilə bağlı yenidənqurma işləri görür. İndi kanalda yeni şlyuz istifadəyə verilib. Yeni şlyuzun tətbiqi kanala 10 min tona qədər tutumu olan gəmilərin buraxılmasına imkan verəcək".
İcazə sisteminin ləğvinə gəlincə, İ.Levitin deyib ki, bu gün xarici ölkələrin bayrağı altında üzən gəmilərin Rusiyanın daxili sularına daxil olması qadağandır:
"Bu qadağa aradan qaldırılandan sonra isə gəmilərin bu kanala keçməsi üçün heç bir icazə tələb olunmayacaq, sadəcə, formal prosedurlar olacaq".
Amma nazir bu yeniliyin nə vaxt baş verəcəyini dəqiqləşdirə bilməyib. Onun sözlərinə görə, indi Rusiya bu məsələni Ümumdünya Ticarət Təşkilatına üzvlük çərçivəsində Avropa Birliyi ilə müzakirə edir, icazə sistemi ilə bağlı yasaqların götürülməsi isə məhz bu məsələlərin həllindən sonra baş verəcək.
|
