Dünən Azərbaycan Media Mərkəzində müxalifətin son aksiyaları zamanı həbs edilənlərin vəkilləri mətbuat konfransı keçirdi ("Turan"). Vəkillər 18 nəfərin qanunsuz təqib edildiyini bildiriblər. Onlardan ikisi - Cabbar Savalan və Bəxtiyar Hacıyev haqqında məhkəmə hökmünün olduğu qeyd edildi. Vəkillərin fikrincə, gənclər sosial şəbəkələr vasitəsilə yaşıdlarını etiraz aksiyalarında iştiraka çağırırdılar və artıq həbs ediliblər.

Daha 15 nəfər 2 aprel mitinqi ilə əlaqədar həbsdədir və onlardan bəzilərinin işi üzrə istintaq yekunlaşıb. İstintaq altında olan AXCP-nin sədr müavini Fuad Qəhrəmanlı isə azadlıqda olsa da, polis nəzarəti altındadır.

Vəkil Əsabəli Mustafayevin açıqlamasına görə, istintaq qərəzli aparılıb. Onun sözlərinə görə, bu işlərdə cinayət tərkibi və cinayət hüququ üçün əsas yoxdur və işlər siyasi motivlidir.

Vəkillər qeyd ediblər ki, hüquqi müdafiə ilə yanaşı, həbs olunanların hər birinin ictimai və tibbi dəstəyə də ehtiyacı var. Həbs olunanlar ədalətsiz olaraq həbsdə saxlanmaları ilə bağlı psixoloji gərginlik yaşayırlar. Müsavat Partiyasının aparat rəhbəri Arif Hacılının səhhətində problemlər yaranıb.

Vəkillər bildiriblər ki, məhkəmə qərarlarının ədalətli olacağına inanmırlar və bütün məhkəmə instansiyalarını keçərək, Avropa İnsan Haqları Məhkəməsinə müraciət etməyə hazırlaşırlar.

hebs,genc,vekil