UEFA İcraiyyə Komitəsi 2013-cü ildə təşkil olunan Çempionlar Liqası, Avropa Liqası, eləcə də Superkubok yarışları final matçlarının keçiriləcəyi məkanların adlarını açıqlayıb. Qitənin ən mötəbər futbol turnirlərinin həlledici oyunlarına ev sahibliyi edəcək stadionlar artıq bəllidir. Belə ki, Çempionlar Liqasının 2013-cü ilin mayında təşkil olunan həlledici oyunu İngiltərədə - Londonun məşhur "Uembli" stadionunda keçiriləcək. Bu onunla əlaqədar olub ki, 2013-cü ildə İngiltərə Futbol Assosiasiyası 150 illik yubileyini keçirəcək. Seçim zamanı bu qurumun dünyada ən yaşlı futbol assosiasiyası olması da nəzərə alınıb. Maraqlıdır ki, Çempionlar Liqasında son final oyunu da məhz "Uembli"də keçirildi və "Barselona" "Mançester Yunayted"ə 3:1 hesabı ilə qalib gəldi.

Həmin ildə Avroliqa turnirinin final görüşü isə Hollandiyada - Amsterdamdakı "Amsterdam Arena"da təşkil olunacaq. Bu iki turnirin qalibi olan klublar isə Superkubok matçında Çexiya paytaxtında - Praqadakı "Eden" stadionunda münasibətlərinə aydınlıq gətirəcəklər. Bununla da UEFA Superkubokunda uzunmüddətlik ənənəyə son qoyulur. Belə ki, 1998-ci ildən etibarən hmin görüş yalnız Monako şəhərindəki "Lui II" stadionunda keçirilirdi. Xatırladaq ki, Çempionlar Liqası 2011/12 mövsümü üçün final görüşü mayın 19-da Almaniyada - "Münhen Arena"da keçiriləcək. Bundan 10 gün qabaq isə Rumıniyanın Buxarest şəhərində Avroliqanın ən güclü klubu müəyyənləşəcək. Yeri gəlmişkən, bu il Avropa turnirlərində ölkəmizi 4 komanda təmsil edəcək. "Neftçi" Çempionlar Liqasında, "Xəzər-Lənkəran", "Qarabağ" və AZAL Avroliqada çıxış edəcəklər. Sonda onu da bildirək ki, İcraiyyə Komitəsinin iclasında 2016-cı il Avropa çempionatının final mərhələsi iştirakçılarının sayı da artırılıb. Bu qitə birinciliyində 16 yox, 24 komanda çıxış edəcək. Turnir çərçivəsində isə 31 yox, 51 qarşılaşma olacaq.