Azərbaycan gələn mövsüm voleybol üzrə Çempionlar Liqası turnirində iki komanda ilə təmsil olunacaq. Avropanın ən nüfuzlu klub turnirində ölkə çempionatının qızıl medallarına sahib çıxan Bakının "Rabitə" və Azərbaycanın ən titullu komandası "Azərreyl" mübarizə aparacaq. Bu mötəbər yarışda 11 ölkədən 20 klub mübarizə aparacaq. Qeyd edək ki, Çempionlar Liqasında yalnız 2 ölkə - İtaliya və Türkiyə 3 komanda ilə mübarizə aparacaq. Azərbaycan, Rusiya, Fransa, Almaniya və Polşa isə yarışa 2 klubla qatılacaq.
Komandalarımızın potensial rəqibləri də məlumdur. Bunlar "Modranska" (Çexiya), "Kann", "Myulhaus" (hər ikisi Fransa), "Şveriner", "Drezdner" (hər ikisi Almaniya), "Foppapedretti", "Villi Korteze", "Skavolini" (hər üçü İtaliya), "Atom", "Muşinyanka" (hər ikisi Polşa), "Konstanta" (Rumıniya), "Dinamo" (Kazan), "Dinamo" (Moskva, hər ikisi Rusiya), "Srvena Zvezda" (Serbiya), "Volero" (İsveçrə), "Fənərbaxça", "VakıfGünəş TTelekom", "Əczaçıbaşı" (hər üçü Türkiyə) klublarıdır. Bu klublardan beşi - "Dinamo" (Kazan), "Şveriner", "Drezdner", "Konstanta" və "Atom" debütantdır. Qeyd edək ki, son mövsümdə "Rabitə" Çempionlar Liqasının gümüş, "Azərreyl" isə "Çelenc Cup"ın qızıl mükafatçısı olub. Komandalarımızın rəqibləri iyulun 1-də keçiriləcək püşkatmadan sonra bilənəcək.
Qarşısına ciddi məqsədlər qoyan və Avropada daha yüksək uğur qazanmaq istəyən "Azərreyl" bu yöndə ciddi addımlar atmaqdadır. Ötənilki heyətdən Azərbaycan yığmasının üzvləri - Valeriya Korotenko, Polina Rəhimova, Aynur Kərimova, Oksana Kiselyova, braziliyalı Paulino De Souza Pereyra, tailandlı Nutsara Tomkom və amerikalı Tamas Cenefferlə növbəti mövsüm üçün razılıq əldə edən Bakı komandası iki gün öncə yığmamızın kapitanı Oksana Parxomenkonu transfer edib. Son 2 mövsümü Moskva "Dinamo"sunda keçirən 27 yaşlı toppaylayıcı ilə 1 illik rəsmi müqavilə imzalanıb. Bu, Oksananın 3 illik fasilədən sonra Azərbaycan komandasına yenidən dönüşüdür. Qeyd edək ki, Parxomenko 2001-2008-ci illərdə də "Azərreyl"in şərəfini qoruyub. O, 2008/2009 mövsümündə isə "Fənərbaxça"da forma geyinib.
"Azərreyl"in Avropa meydanlarında uğur qazanmaq istəyi komandanın baş məşqçi postunda da dəyişiklik məsələsini gündəmə gətirib. Belə ki, Azərbaycanın qadın voleybolçulardan ibarət milli komandasının baş məşqçisi Faiq Qarayev yenidən "Azərreyl"i çalışdıra bilər. Bu gerçəkləşərsə, komandanın Qarayevlə daha yüksək uğurlar qazanacağını proqnozlaşdırmaq olar. Hər halda, 54 yaşlı mütəxəssis yaradıcılarından olduğu Bakı klubu ilə 2002-ci ildə "Top- komandalar" kubokunu qazanmışdı. Bundan əlavə, "Azərreyl"i 2003/2004 mövsümündə Çempionlar Liqasının "Dördlər finalı"na yüksəltmişdi. Qeyd edək ki, son mövsümdə "Azərreyl"i onunla birgə Azərbaycan yığmasında və paytaxt klubunda işləmiş Vüqar Əliyev çalışdırırdı. Gənc məşqçi debüt ilindəcə komandaya "Çelenc Cup"ı qazandırdı.
|
