Həftənin sonunda İnqilab Məhkəməsində Təbrizin "Traktor" komandası və 4 nəfər azərbaycanlı futbolsevərlə bağlı proses keçirilib. Təbrizdə keçirilmiş bu məhkəmədə Şəbüstər şəhərindən Behnam Nurməhəmmədi və Vəli Rövşəni, Ərdəbildən Mehdi və Rəhim Qulabi mühakimə olunublar. Onlar ötən il oktyabrın 10-da "Traktor"la Əhvazın "Neft" futbol klubu arasında Təbrizin Səhənd stadionunda keçirilmiş oyun bitdikdən sonra təhlükəsizlik qurumunun əməkdaşları tərəfindən tutulmuşdular. 12 gün saxlandıqdan sonra hər biri 10 min dollarlıq mülkü girov qoyaraq zaminə buraxılmışdılar.
Məhkəmə bu gəncləri "İran İslam Respublikasına qarşı çıxışda" suçlandırır.
Elə ötən həftənin sonunda jurnalist Səid Muğanlı da Ərdəbil əyaləti, Üngüt rayonu, Yelsu kəndində həbs olunub. Hələlik ona qarşı irəli sürələn ittiham açıqlanmayıb. Səid Muğanlı və Səid Nəiminin azadlığa buraxılma tələbi ilə imzatoplama kampaniyası keçirilir. Səid Nəimi isə bu il mayın 9-da tutulub.
Onlar Güney Azərbaycan türklərinin milli-mədəni haqları ilə bağlı məqalə və araşdırmalarla çıxış edib.
|
