"musavat.kom" portalının yaydığı məlumata görə, saat 17 radələrində beynəlxalq təşkilatların Bakıda yerləşən nümayəndəliklərinin və bir sıra aparıcı Qərb dövlətlərinin ölkəmizdəki səfirliklərinin təmsilçiləri görüşə gəliblər.
Görüşə gələnlərin sırasında ATƏT Bakı ofisinin rəhbəri Əli Bilgə Cankorel, Norveç və Böyük Britaniya səfirləri, ABŞ səfirliyinin siyasət məsələləri üzrə katibi və başqa diplomatlar olublar. Onlar media təmsilçilərinə heç bir açıqlama verməyərək görüş keçiriləsi otağa gediblər.
İctimai Palata tərəfdən diplomatlarla Müsavat Partiyası başqanı İsa Qəmbər, AXCP sədri Əli Kərimli, İctimai Palata Koordinasiya Şurasının üzvləri Mehriban Vəzir, Vidadi Mirkamal və Zəfər Quliyev görüşüblər. Görüş qapalı keçirilib. Hansı mövzuların müzakirə olunduğu barədə açıqlama verilməyib.
Məlumata görə, mülki formalı polis əməkdaşları Müsavat Partiyası qərargahı ilə üzbəüzdə yerləşən avtomobil təmiri sexlərinin qarşısında dayanıb müşahidə aparıblar və həmin şəxslər diplomatları gətirən maşınların nömrələrini qeyd edirlər.
Belə ki, İP rəhbərləri ilə diplomatların görüşü təxminən saat yarım çəkib və 18:30-da görüş başa çatıb. ATƏT Bakı ofisinin rəhbəri Əli Bilgə Cankorel görüş barədə məlumat verərək bildirib ki, toplantı İctimai Palatının təşəbbüsü ilə keçirilib və müzakirə mövzusu İctimai Palatanın hazırladığı "Demokratiyaya keçidin yol xəritəsi" adlı sənədin müzakirəsinə həsr olunub. Bundan başqa, Cankorel görüşdə Azərbaycandakı ictimai-siyasi durumun da müzakirə predmeti olduğunu bildirib.
Müsavat Partiyası başqanı İsa Qəmbər jurnalistlərə açıqlamasında Cankorelin söylədiyindən fərqli bir söz deməyib. Müsavat Partiyası başqanı görüşün faydalı olduğunu qeyd edib.
Qeyd edək ki, analitiklər bu görüş zamanı iqtidar-müxalifət dialoqu məsələsinin də müzakirə olunacağını proqnozlaşdırırdılar. Amma bu görüş iqtidarın xoşuna gəlməyib. Görüşə hakimiyyətin zirvəsindən hələlik münasibət bildirilməsə də, hakim Yeni Azərbaycan Partiyası icraçı katibinin müavini, MM deputatı Mübariz Qurbanlı qərbli diplomatların qeydiyyatdan keçməyən bir qurumla böyük təmtəraqla görüş keçirməsini həmin diplomatların özlərinin nüfuzuna xələl gətirən nüans kimi dəyərləndirib.
Eyni zamanda onu da xatırladaq ki, iyunun 19-da İctimai Palata şəhərin mərkəzində növbəti mitinqini keçirməyə hazırlaşır və qərbli diplomatlar bu mitinqi yaxından müşahidə edəcəklərini bəyan ediblər.
|
