Birləşmiş Ştatlar Maliyyə Nazirliyinin təmsilçisi Devid Koen Yaponiya və Cənubi Koreyaya səfər edəcək. Devid Koen rəsmi Tokio və Seulla İrana qarşı yeni yasaqların tətbiqinə dair müzakirələr aparacaq, deyə Bi-Bi-Si rus xidməti xəbər yayıb.
İran nüvə proqramını dayandırmadığına görə BMT Təhlükəsizlik Şurası indiyədək ona qarşı 6 qətnamə qəbul edib. Bu sənədlərdə Tehran hakimiyyətinə qarşı iqtisadi və siyasi yasaqlar nəzərdə tutulub. Apreldə isə Devid Koen Türkiyədə olmuşdu. Yerli iş adamları ilə görüşü zamanı bildirmişdi ki, əgər türkiyəli biznesmenlər İran kimi dövlətlərlə ticarət əlaqəsi qurarlarsa, ABŞ-ın maliyyə sisteminə girmək imkanını itirəcəklər.
İsrail baş nazirinin müavini Dan Meridor bu fikirdədir ki, "İrana qarşı iqtisadi və siyasi təzyiqlər günü-gündən güclənərsə, o zaman sanksiyaların səmərəsi olar". Vyanada Atom Enerjisi üzrə Beynəlxalq Agentliyin baş direktoru Yukia Amano ilə görüşündə Meridor təzyiqlərin artırılmasının vacibliyini vurğulayıb: "İran nüvə proqramına görə hər gün itirdiyi pullara nəzər yetirməlidir. Onlar bilməlidir ki, mövcud durum xeyirlərinə deyil".
Yeri gəlmişkən, İsrail rəsmiləri İrana qarşı sanksiyaların sərtləşdirilməsindən danışsalar da, özləri Tehrana qarşı ciddi sanksiya qəbul etməyib. "Ofer qardaşları şirkətlər qrupu"na qarşı ABŞ sanksiya tətbiq edəndən sonra məlum oldu ki, yəhudi iş adamları İranla ciddi ticarət əlaqəsi qurub. Həmin hadisənin ardınca İsrail parlamenti İranla əməkdaşlıq edən şirkətə 1,46 milyon dollar məbləğində cərimə və bir il müddətinə müəssisənin rəhbərini azadlıqdan məhrum edəcəyi haqda qərar qəbul edib.
İran prezidenti Əhmədinejad ötən gün bildirib ki, ABŞ, Britaniya, Fransa, Almaniya, Rusiya, Çindən ibarət altılığın heç bir şərti danışıqların gündəliyinə çıxırıla bilməz. Onun sözlərinə görə, Tehran öz atom-nüvə proqramını bundan sonra da davam etdirəcək.
İran rəhbərliyinin atom-nüvə proqramı ilə bağlı israrlı və inadlı davranışı bir daha ciddi narahatlığa səbəb olub. Bəziləri hesab edir ki, aviazərbələr (nüvə obyektlərinin bombardmanı) də Tehranın nüvə proqramını dayandıra bilməz.
"RAND" araşdırma mərkəzinin mütəxəssisi Qreqori Consun sözlərinə görə, İran hakimiyyəti atom bombası əldə etməyə indiki qədər yaxın olmayıb. "Uranı bu sürətlə zənginləşdirərsə, o zaman yaxın 8 həftəyə Tehran ilk bombasını əldə edəcək. Bəzi mərhələdə nüvə proqramının inkişafında uğursuzluqla üzləşdiklərini bildirsələr də, İran rejimi inadla bombaya sarı irəliləyir" - deyə Cons söyləyib. O, indiki şəraitdə İranın atom-nüvə proqramını dayandırmaq üçün İrana qarşı quru əməliyyatlarına başlamağı təklif edir: "Hava zərbələri artıq yetərli səmərə verməyəcək. Gerçəklik budur - ABŞ və İsrail İranın nüvə başlığı hazırlamasına əngəl ola bilmədi".
Onun sözlərinə görə, İranla danışıqlar siyasətinin nəticə vermədiyini qəbul etmək lazım gəlir: "Tehran istehsal etdiyi 38,3 kq uranı 19,7 faizə qədər zənginləşdirib. Sentrifuqalar əvvəlki güclə işləyərsə, o halda İran rəhbərliyi yaxın iki ayda 90 faizədək zənginləşdirilmş 20 kq uran əldə edəcək. Bu isə nüvə başlığı üçün yetərlidir".
|
