İyunun 12-də Türkiyədə parlament seçkiləridir. Seçki bir sıra beynəlxalq müşahidəçilər tərəfindən izlənəcək. Müşahidə missiyaları arasında Türk Parlament Assambleyası da var.
TÜRKPA katibliyindən aldığımız bilgiyə görə, beynəlxalq müşahidəçi missiyası Türkiyə parlament seçkilərinin hazırlıq prosesini və bilavasitə seçki prosesini Ankarada izləyəcək. TÜRKPA heyətinin Türkiyə Xarici İşlər Nazirliyi və Mərkəzi Seçki Komissiyasında görüşünün keçiriləcəyi də nəzərdə tutulub.
Missiyanın tərkibinə Azərbaycan, Qazaxıstan, Qırğızıstan parlamentlərinin deputatları və TÜRKPA Katibliyinin əməkdaşları daxildir. TÜRKPA heyəti seçkilərin yekununa dair rəsmi hesabatı sonradan beynəlxalq təşkilatlara və mətbuata təqdim edəcək. Qeyd edək ki, Türkiyədə parlament seçkilərini ATƏT və Avropa Şurasının beynəlxalq müşahidəçiləri də izləyəcək.
|
