Ölkədə minimum əməkhaqqı 85 manatdır. Rəsmi rəqəmə görə, bu ilin yanvar-aprel aylarında orta aylıq əməkhaqqı 348,6 manat təşkil edib. Avropa Sosial Xartiyasının tələblərinə görə isə, minimum əməkhaqqı hesablanmış orta əməkhaqqın 68 faizindən aşağı olmamalıdır! Deməli, əməyin ödənişini xartiyanın tələblərinə uyğunlaşdırmaq üçün minimum əməkhaqqı 237 manat səviyyəsinə çatdırılmalıdır. Çünki bunu Azərbaycanın da qoşulduğu Avropa Sosial Xartiyası tələb edir.
İqtisadi Təşəbbüslərə Yardım İctimai Birliyinin eksperti Cavid Xəlilovun bildirdiyinə görə, inkişaf etmiş ölkələrdə xartiyanın tətbiqi məqsədilə sosial siyasət sistemində ciddi institusional islahatlar aparılıb. Azərbaycanda isə sosial siyasətə institusional yanaşmada ciddi islahatların şahidi olmuruq. Belə ki, ekspertin sözlərinə görə, hazırda Avropada sosial siyasət əsas üç hədəfə yönəlib:
"Çox miqdarda və keyfiyyətli iş yerlərinin yaradılması, sosial daxilolma, yəni cəmiyyət həyatında iqtisadi və sosial iştiraketmə və hamı üçün bərabər imkanlar. Ancaq Əmək və Əhalinin Sosial Müdafiəsi Nazirliyinin 1999-cü ildə təsdiq edilmiş əsasnaməsində və digər sənədlərdə analoji hədəflər müəyyən edilməyib. Bu səbəbdən, hökumətin yeni dövrdə sosial siyasətə yeni baxışı formalaşmalıdır".
Nazirliyin isə rəsmi vebsəhifəsi indiyə qədər istifadəyə verilməyib. Baxmayaraq ki, indiki zamanda dünyada rəsmi vebsəhifəsi olmayan dövlət orqanını təsəvvür etmək çətindir. AB ölkələrinin, demək olar, hamısında bu cür internet-saytlarda ölkədə tətbiq edilən və gələcək üçün hədəf kimi müəyyən edilən həyat standartlarının indikatorları yerləşdirilir.
Cavid Xəlilovun sözlərinə görə, Çexiyanın Əmək və Sosial Məsələlər Nazirliyinin saytında ölkə əhalisi üçün "gəlir və həyat standartları" müəyyən edilib. Bu səbəbdən, ölkədə sosial siyasətə institusional yanaşmanı dəyişmək hökumətin qarşısında duran vacib hədəflərdən biri kimi görünür.
|
