Küveytdə çıxan "əs-Siyassah" qəzeti yazır ki, İrana və Livandakı "Hizbullah"a işləyən casus şəbəkəsi aşkarlanıb. Bu xəbər mətbuata iki ay sonra sızıb. Küveyt hərbi tribunalı başqa bir casus şəbəkəsinin üzvü olan iki iranlını mühakimə edib. 2010-cu ildə aşkarlanan bu şəbəkənin üzvlərinə edam hökmü çıxarılmışdır.
Qəzetin yazdığına görə, bu cinayət işi "son dərəcə gizli şəkildə" aparılır. Bilinən yalnız odur ki, şəbəkə üzvlərindən biri Küveyt kəşfiyyatının zabiti imiş. Şəbəkəyə İran, Suriya, Livan və Küveyt vətəndaşları daxildir. Bu qrupun həm də Livan "Hizbullah"ına işlədiyi aşkar edilib. "əs-Siyassah" yazır:
"Şəbəkə üzvləri Bəhreyndə xaos və vətəndaş savaşının başlamasını gözləyirmiş. Həmin vaxt qrup Küveytdə də qiyam və qarışıqlıq təşkil etməli imiş. Axtarış zamanı əldə edilən materiallara əsasən, şəbəkə üzvləri Küveytin həyati vacib obyektləri və ticarət mərkəzlərində bir neçə terakt planlaşdırıbmış. Onların hədəflərindən biri həm də ölkə əhalisini kütləvi terrora məruz qoymaq imiş. Tutulanların etirafına əsasən, şəbəkənin fəaliyyəti Küveytlə mədudlaşmır. Onlar Körfəz Ölkələri Əməkdaşlıq Şurasının üzvü olan dövlətlərdə də terror aksiyası gerçəkləşdirmək niyyətində olublar".
Hüsni Mübarək dönəminin başa çatmasına İran da sevinir, ikitərəfli əlaqələrin genişlənəcəyinə dair nikbin bəyanatlar verirdi. Ötən həftənin sonunda isə iranlı diplomat Seyid Kazım əl-Hüseyninin casusluqda şübhəli bilinərək, həbs edildiyi haqda məlumat yayılıb. Misirdə çıxan "əl-Yaum əs-Sabiyyə" qəzetinin yazdığına görə, diplomat Misir və körfəz dövlətlərinin iqtisadi, siyasi və hərbi vəziyyətinə dair məlumatlar toplayaraq Tehrana ötürürmüş.
"əl-Ərəbiyyə" telekanalına əsasən, İran son zamanlar Misirdə yaranmış qarşıqlıqdan yararlanaraq, casusluq fəaliyyətini artırıb. Prokurorluq S.K.əl-Hüseyninin qurduğu casusluq şəbəkəsinə daxil olanları müəyyənləşdirməyə çalışır.
Bu xəbərdən sonra ETTELAAT şefi Heydər Müslehi məsələyə dair açıqlama verib. Onun sözlərinə görə, iranlı diplomatı Misir hakimiyyəti sərbəst buraxıb, hətta "üzr də istəyib". Amma şef sözügedən casus şəbəkəsi ilə bağlı qalmaqala açıqlıq gətirməyib. Xarici işlər naziri Ə.Salehi isə olaydan sonra deyib ki, Misirlə əlaqələrin qurulmasına səbirlə "dözməliyik".
Qahirə rəsmiləri K. əl-Hüseyninin "arzuolunmaz şəxs" kimi 24 saat ərzində Misirdən çıxarılacağını bildirmişlər.
|
